Galileapi predican, apostolkunatapas kachan

Iskay wata jinañan Jesusqa mana sayk’uspa predicasharan. Ichaqa astawanraqmi predicanan karan, chaymi Galileapi ‘llapa llaqtakunata llapa ayllukunatawan puriran sinagogakunapi yachachispa, Diospa gobiernonmanta allin willakuykunata willaspa, imaymana onqoyniyoqkunata nanayniyoqkunatawan qhaliyachispa’ ima (Mateo 9:35). Chay purisqanpin payqa rikuran astawanraq predicanan kasqanta.

Chaypin runakunatapas rikuran mana michiqniyoq ovejakuna jina khuyay k’irisqa kashasqankuta. Chaymi paykunata khuyapayaspa discipulonkunata niran: “Cosechanaqa askhapunin kashan, llank’aqkunan ichaqa pisilla kanku. Chayrayku, cosecha oqarichiq dueñota rogakuychis cosechanman llank’aqkunata kachamunanpaq”, nispa (Mateo 9:37, 38).

Jinan 12 apostolninkunata iskay-iskaymanta kacharan: “Aman mana judío runakunaq ñannintaqa rinkichischu, amallataq Samaria runakunaq llaqtanmanpas jaykunkichischu. Aswanpas, Israel llaqtamanta chinkasqa ovejakunallamanmi rinkichis. Rispaqa khaynatan ninkichis: ‘Janaq pacha gobiernon qayllaykamunña’”, nispa (Mateo 10:5-7).

Chay gobiernomantaqa ñan “Yayayku” nisqa mañakuypipas rimaranña. Ichaqa, ¿imanaqtinmi “janaq pacha gobiernon qayllaykamunña” nispa willananku karan? Chaywanmi rikuchinanku karan Diospa ajllasqan rey Jesucristo kay pachapi kashasqanta. Chaymantan Jesusqa paykunaman atiyta qoran gratislla milagrokunata ruwanankupaq, chaywanmi paykunaqa rikuchinanku karan chay gobiernomanta representantekuna kasqankuta.

Jesusqa apostolkunatan nillarantaq: ‘Aman apankichischu qoqawata, llank’aqqa chaskinanpunin mijunantaqa. Aman apankichischu qolqetapas, cambiakunaykichispaq p’achatapas, usut’atapas’, nispa (Mateo 10:10). Paykunamanqa sumaqta chaskiq runakunan ima necesitasqankutapas qonanku karan. Chaymi Jesusqa niran: “Maypipas juj wasiman jaykuspaykichisqa chaypin qhepakunkichis chay llaqtamanta lloqsipunaykichiskama”, nispa (Marcos 6:10).

Jesusqa yachachillarantaqmi imaynatachus wasin-wasinta predicananku karan chaytapas. Niranmi: ‘Juj wasiman jaykuspaqa napaykunkichismi chaypi kaqkunata. Paykunachus uyarikunankupaq jina kanqaku chayqa, thaj kay paykunapaq kachun; mana chayqa, thaj kay qankunaman kutimpuchun. Maypipas mana chaskisunkichischu chayqa, chaymanta lloqsipushaspan chakiykichispi kaq allpata chhafchirparinkichis’, nispa (Mateo 10:12-14).

¿Iman pasanan karan apostolkunaq willasqanta mana uyarikuq llaqtakunawan? Diospa juchachasqanmi kananku karan. Chaymantan Jesusqa niran: “Juicio p’unchaypiqa chay llaqtan aswan castigasqa kanqa Sodoma, Gomorra llaqtakunamantaqa”, nispa (Mateo 10:15).