Señorpa cenan

Apostolkunaq chakinta maqchisqan qhepamanmi Jesusqa rey Davidpa qelqasqanman jina niran: “T’anta mijuqmasiymi noqa contra jatarin”, nispa. Jinaspa niran: “Qankunamanta jujniykichismi enemigoykunaman jap’ichiwanqa”, nispa (Salmo 41:9; Juan 13:18, 21).

Chayta niqtinmi apostolkunaqa qhawanakuranku, jinaspa sapankanku Jesusta tapuranku: “Señor, ¿noqachu kani?”, nispa. Judas Iscariotepas chhaynatan tapuran. Jinan Pedroqa Juanta niran pimantachus rimasharan chayta tapunanpaq. Juantaq Jesusta tapuran: “Señor, ¿pitaqri?”, nispa (Mateo 26:22; Juan 13:25).

Jinan Jesusqa niran: ‘Pimanchus t’antata qosaq chaymi’, nispa. Jinaspan t’antata challpuspa Judasman qoran, nirantaq: “Runaq Churinqa ripunqan imaynachus paymanta qelqasqa kashan chayman jina, ichaqa, ¡ay imaraqmi kanqa runaq Churinta jap’ichiq runamantaqa! Chay runapaqqa mana naceymi aswan allin kanman karan”, nispa (Juan 13:26; Mateo 26:24). Chay qhepamantaq Satanasqa Judaspa sonqonman jaykuran. Judasqa millay sonqoyoqman tukupusqanraykun Saqraq munayninta ruwaran, chhaynapitaq ‘chinkachisqa kananpaq jina kapuran’ (Juan 6:64, 70; 12:4; 17:12).

Chaymantataq Jesusqa Judasta niran: “Imachus ruwanaykita usqhaylla ruwamuy”, nispa. Apostolkunataq mana chayta entienderankuchu. Wakinmi nisharanku: “‘Fiestapaq imakunachus faltawashanchis chayta rantimuy’, otaq ‘wajchakunaman imallatapas qomuy’ nispapaschá nishan”, nispa (Juan 13:27-30). Judastaq chaymanta lloqsiran Jesusta traicionananpaq.

Jinan Jesusqa jujniray cena ruwayta qallarichiran. Juj t’antata jap’ispan Diosman graciasta qoran, p’akispataq apostolkunaman jaywaran: “Kayqa cuerpoytan representan, chayqa qankunaraykun qosqa kanqa. Kaytaqa ruwallankichispunin noqata yuyariwanaykichispaq”, nispa (Lucas 22:19). Paykunataq chayta jaywanakuspa mijuranku.

Chaymantan Jesusqa vinoyoq copatañataq jap’iran, Diosman graciasta qospataq paykunaman qoran: ‘Kay copaqa mosoq rimanakuy qallarinanpaq yawarniytan representan, chaymi qankunarayku jich’asqa kanqa’, nispa (Lucas 22:20). Apostolkunataq chayta ujaranku.

Chhaynatan Jesusqa llapa discipulonkunata kamachisharan paypa wañusqanta sapa wata nisán killapi 14 p’unchaypi yuyarinankupaq. Chaywanmi yuyarinanku karan imaynatas Diosqa wawan Jesuswan juchamanta wañuymantawan paykunata libraran chayta, imaynatas llapan iñiq runakunapaqpas salvakuy ñanta kichariran chaytawan; chaymi chay yuyariyqa aswan importante kanan karan Pascua fiestamantapas.

Jesuspa nisqan jina, paypa yawarninqa ‘askha runakunaq juchan perdonasqa kananpaqmi jich’asqa kanan karan’. Chay runakuna ukhupin kasharanku paypa junt’aq apostolninkuna, paykuna jina kaq llapan discipulonkunapas. Paykunawanmi Jesusqa Yayanpa gobiernonpi kanan karan (Mateo 26:28, 29).