Señorpa cenan

Judiokunaqa Pascua Fiestatan sapa wata nisán killapi 14 p’unchaypi festejaqku. Chaypin yuyariqku Egiptopi esclavo kasqankumanta Jehová Dios imayna librasqanta, prometesqan jallp’aman pusasqantapas. 33 watapin Jesusqa apostolninkunawan Pascua Fiestata festejarqanku Jerusalenpi juj altos cuartopi. Mijuyta tukusqanku qhepamanmi Jesusqa nirqan: “Jujniykichismi traicionawankichis”, nispa. Apostolkunataq admirakuspa tapurqanku: “¿Pitaqri Señor?”, nispa. Jesustaq nirqan: “T’antata jaywasqay runan”, nispa. Jinan Jesusqa t’antata jaywarqan Judas Iscarioteman. Chaymi Judasqa kaqpacha lloqsirqan.

Jinan Jesusqa mañakuspa t’antata p’akispa apostolkunaman jaywarqan, nirqantaq: “Mijuychis kay t’antata. Kayqa qankunarayku qosqay cuerpoytan representan”, nispa. Wajmanta mañakuspataq apostolkunaman vinota jaywaspa nirqan: “Ujaychis kay vinota. Kayqa yawarniytan representan. Chaytan qosaq juchaykichis perdonasqa kananpaq. Prometeykichismi noqawan kuska janaq pachapi rey kanaykichispaq. Sapa watataq kayta ruwankichis yuyariwanaykichispaq”, nispa. Chayta yuyarinankupaqmi Jesuspa discipulonkunaqa sapa wata juñukunku. Chay juñunakuytan “Señorpa cenan” nispa sutichanku.

Chay qhepatan apostolkunaqa discutirqanku pichus paykunamanta aswan kuraq kasqanmanta. Jesusmi ichaqa nirqan: “Qankuna ukhupi kuraqpaq qhawarikuqqa sullk’a jina kachun”, nispa.

Jesusmi nillarqantaq: “Qankunaqa amigoykunan kankichis. Chaymi Taytaypa niwasqanta willaykichis. Taytaypa kasqanmanmi risaq. Qankunan ichaqa kaypi qhepakunkichis. Munanakuqtiykichismi runakunaqa yachanqaku discipuloykuna kasqaykichista. Qankunata munakusqayta jinan munanakunkichis”, nispa.

Jesusqa Diostan mañakurqan discipulonkunata pakaykunanpaq, juj jinalla thajpi llank’anankupaq yanapananpaqpas. Mañakurqanmi Diospa sutin ch’uyanchasqa kananpaqpas. Chay qhepamanmi Jesusqa apostolkunawan Jehová Diospaq takirqanku, jinaspa jawaman lloqsirqanku. Ñan tiempoña kasharqan Jesusta jap’inankupaq.