Galilea qocha patapi Jesusta rikunku

Última cenapin Jesusqa niran: ‘Kausarichisqa kasqay qhepamanqa Galileamanmi risaq, chaypin suyamusaykichis’, nispa (Mateo 26:32; 28:7, 10). Chaymi askha discipulonkuna Galileata riranku, ichaqa manan yacharankuchu imatachus chaypi ruwananku karan chayta.

Chaymi apóstol Pedroqa soqta apostolkunata niran: “Challwaqmi risaq”, nispa. Jinan paykunapas: “Jaku noqaykupiwan”, niranku (Juan 21:3). Ichaqa manan imatapas chay tutaqa challwarankuchu. Illarimuqtintaq juj runata qocha patapi rikuranku. Chay runan paykunata niran: “Wawallaykuna, ¿kashanchu imallaykichispas mijunaykichispaq?”, nispa. Paykunataq: “¡Manan!”, niranku. Chaymi payqa niran: “Challwanaykichis llikata boteq paña ladonman wijch’uykuychis”, nispa (Juan 21:5, 6). Jinan paykunaqa llikata wijch’uykuranku, ichaqa manan orqoytapas atirankuchu askhallaña challwa kasqanrayku.

Jinan Juanqa Pedrota niran: “¡Señortáq!”, nispa (Juan 21:7). Jinan Pedroqa p’achanwan churakuspa qochaman p’itaykuran, jinaspa 90 metrota jina nadaran qocha patakama. Wakinkunataq ichaqa botellapi riranku llika aysantin.

Qocha pataman chayaspankun paykunaqa rikuranku ‘t’antata, sansa patapi challwatapas’. Chaypin Jesusqa niran: “Jap’imusqaykichis challwakunamanta wakinta apamuychis”, nispa. Jinan Pedroqa llikata orqomuran, chaypin kasqa 153 jatun challwakuna. Jesustaq niran: “Jamuychis, mijuykuychis”, nispa. Paykunaqa yacharankun Jesús kasqanta, chaymi mana mayqenninkupas tapuranchu: “¿Pin kanki?”, nispa (Juan 21:9-12). Chaywanqa kinsa kutitañan Jesusqa askha discipulonkunawan rikuchikusharan.

Mijuchisqan qhepamanmi Jesusqa imachus aswan importante karan chayta reparachinanpaq Pedrota niran: “Juanpa wawan Simón, ¿kaykunamanta astawanchu munakuwanki?”, nispa. (Chaytaqa challwakunata qhawaspan ninman karan). Jinan Pedroqa niran: “Arí, Señor, yachashankimá riki qanta munakusqaytaqa”, nispa. Jesustaq payta niran: “Chhaynaqa, ovejachaykunata michipuway”, nispa (Juan 21:15).

Jesusqa tapullarantaqmi: “Simón, ¿munakuwankichu?”, nispa. Pedrotaq niran: “Arí, Señor, yachashankimá riki qanta munakusqaytaqa”, nispa. Jesustaq niran: “Chhaynaqa, ovejachaykunata michipuway”, nispa (Juan 21:16).

Jujtawanmi Jesusqa tapullarantaq: “Simón, ¿munakuwankichu?”, nispa. Jinan Pedroqa sinchita llakikuran kinsa kutitaña chayta tapusqanrayku, chaymi niran: ‘Señor, yachashankimá riki qanta munakusqaytaqa’, nispa. Jinan Jesusqa niran: “Chhaynaqa, ovejachaykunata michipuway”, nispa (Juan 21:17). Chaywanmi Jesusqa rikuchisharan llapa umalliqkuna Diospa ovejankunata qhawarinanku kasqanta.

Pedroqa Jesús jinan wañuchisqa kanan karan, chayta yachaspan Jesusqa payta niran: ‘Waynallaraq kashaspaykiqa qanllan p’achakuq kanki, maynintachus munasqaykitan puriqpas kanki. Machuyapuqtiykin ichaqa juj p’achachisunki, mana munasqaykimantaq apasunkipas’, nispa. Chayta nispataq niran: “Qatikamuwashallay”, nispa (Juan 21:18, 19).

Jinan Pedroqa Juanta rikuspa Jesusta tapuran: “Señor, ¿payri imatataq ruwanqa?”, nispa. Jinan Jesusqa payta niran: “Munaqtiyqa payqa kausanmanmi kutimunaykamapas, ¿imataq qanmanri qokusunki? Qanqa qatikamuwashallay”, nispa (Juan 21:21-23). Jesuspa nisqan jina, Pedroqa jujkunawan mana comparakuspallan payta qatikunan karan. Juanqa llapa apostolkunamantan astawan kausanan karan, juj rijuriypitaq Jesusta reyña kutimushaqta rikunan karan.

Jesusqa imaymanakunatawanraqmi ruwaran, llapanta qelqakunman karan chayqa, jayk’a librokunaraqchá ruwakunman karan.