Jesús challwaqkunaman rijurin

Apostolkunaman Jesuspa rijurisqan qhepamanmi Pedroqa rirqan Galilea lamar-qochapi challwamunanpaq. Paywantaq rirqanku Tomás, Santiago, Juan, juj discipulokunapiwan. Tutantinmi ichaqa mana imatapas challwarqankuchu.

Tutamantantan juj runata lamar-qocha cantopi rikurqanku. Chay runan paykunata nirqan: “¿Manachu imallatapas challwarqankichis?”, nispa. Paykunataq nirqanku: “Manan”, nispa. Paytaq nirqan: “Boteq paña ladonman mallaykichista wijch’uykuychis”, nispa. Chayta ruwaqtinkun mallankuman askha challwa junt’aykurqan. Jinan Juanqa nirqan: “Señormi”, nispa. Pedrotaq kaqpacha unuman saltaykuspa lamar-qochaq cantonkama nadamurqan, jujkunataq botepi jamurqanku.

Chayamuspan rikurqanku sansa patapi challwa kashaqta t’antatawan. Jesustaq nirqan: “Jap’imusqaykichis challwakunatawan apamuychis”, nispa. Chay qhepamantaq nirqan: “Desayunaychis”, nispa.

Desayunayta tukusqanku qhepamanmi Jesusqa Pedrota tapurqan: “¿Kay challwakunamanta astawanchu munakuwanki?”, nispa. Pedrotaq nirqan: “Arí, Señor, yachankin munakusqaytaqa”, nispa. Jesustaq nirqan: “Chhaynaqa ovejaykunaman mijuchiy”, nispa. Jesusqa wajmantan tapurqan: “¿Munakuwankichu?”, nispa. Pedrotaq nirqan: “Arí, Señor”, nispa. Jesustaq nirqan: “Ovejachaykunata michiy”, nispa. Kinsa kutipi tapuqtinmi Pedroqa nirqan: “Señor, qanqa tukuytan yachanki. Yachankin munakusqayta”, nispa. Jesustaq nirqan: “Ovejachaykunaman mijuchiy”, nispa. Jinaspapas nirqanmi payta qatikushanallanpaq.