Ñausapuni naceq runata Jesús qhaliyachin

Jerusalenpi sábado p’unchaypi purishaspankun Jesuswan discipulonkunawan juj mañapakuq ñausa runata rikuranku, chay runaqa ñausapunin nacesqa. Chaymi discipulonkunaqa Jesusta tapuranku: “Yachachikuq, ¿pitaq juchallikuran kay runa ñausa nacenanpaqri? ¿Paychu icha tayta-mamanchu?”, nispa (Juan 9:2).

Paykunaqa yachaytachá munasharanku pipas mamanpa wijsallanpiraq kashaspa juchallikuyta atinmanchu chayta. Chaymi Jesusqa niran: “Manan kay runachu ni tayta-mamanpaschu juchallikun, aswanmi kayqa kashan Diospa ruwayninkuna paywan rikuchisqa kananpaq”, nispa (Juan 9:3). Chay runaqa ñausa kasharan lliu runa jina Adanpa miraynin kasqanraykun. Adanpa juchan jawan lliu runapas cuerponchispi imaymana nanayniyoq kanchis, chaymi wakinqa mana normalchu nacenkupas. Chay runaq ñausa kasqanmi ichaqa kusa karan ‘Diospa ruwayninkunata’ Jesús rikuchinanpaq, imaynan juj onqosqa runakunapipas rikuchiranña jinata.

Chaymantan Jesusqa niran: “P’unchayraq kashaqtinmi kachamuwaqniypa qowasqan llank’anataqa ruwashananchis, tutayaqtinqa manañan pipas llank’ayta atinqachu. Kay pachallapiraq kashaspayqa kay pachapaqmi k’anchay kani”, nispa (Juan 9:4, 5). Jesusqa k’anchay jinan karan kausashanankama, wañupuspan ichaqa tutayaq sepulturapi kanan karan, manataqmi chaypiqa imatapas ruwananchu karan.

¿Imaynatan Jesús qhaliyachiran chay ñausa runata? Pampaman thoqaspan t’uruta ruwaran, chaywantaq chay runaq ñawinta llunch’iran, jinaspa niran: “Phaway Siloam estanquepi maqchirakamuy”, nispa (Juan 9:7). Chay runa maqchirakamuqtintaq ñawinqa kicharikapuran. ¡Maytachá payqa chaywan kusikuran!

Chhayna qhalita rikuspan reqsisqankunaqa ancha admirasqa ninakuranku: “¿Manachu kayqa kashan limosna mañapakuq runa?”, nispa. Wakinmi nisharanku: “Paymi”, nispa. Wakintaq nisharanku: “Paymanña rijch’akun chaypas, manan paychu”, nispa. Jinan payqa niran: “Noqan kani”, nispa (Juan 9:8, 9).

“¿Imaynapitaq ñawiykiri kicharukun?” nispa tapuqtinkutaq payqa niran: “‘Jesús’ sutiyoq runan t’uruta ruwaruspa chaywan ñawiyta llunch’iruwan, jinaspa niwan: ‘Phaway Siloampi maqchirakamuy’, nispa. Chaymi noqaqa rispa maqchikamurani, jinan ñawiyqa kicharirukun”, nispa. Jinan tapuranku: “¿Maytaq chay runari?”, nispa, paytaq niran: “Manan yachanichu”, nispa (Juan 9:10-12).

Chaymantan paykunaqa fariseokunaman pusaranku. Chaypin paykunamanpas willaran: “T’uruwanmi ñawiyta llunch’iruwan, maqchikamuqtiytaqmi ñawiyqa kicharakapun”, nispa. Chaywan kusikunankumantan ichaqa wakin fariseokuna Jesús contra niranku: “Chay runaqa manan Diosmantachu kanman. Diosmanta kanman chayqa, waqaychanmanchá sábado p’unchayta”, nispa. Wakintaq ichaqa niranku: “¿Imaynapitaq juj juchasapa runari milagrokunata ruwanman?”, nispa (Juan 9:15, 16). Paykunaqa t’aqanasqan kasharanku.

Chaymi chay qhaliyachisqa runata niranku: “Ñawiykitataq kicharin chayqa, ¿ima ninkitaq qanri paymanta?”, nispa. Paytaq niran: “Payqa profetapunin kanman”, nispa (Juan 9:17).

Fariseokunan ichaqa mana chay nisqanta creerankuchu. Paykunaqa chay runata qhawarisharanku Jesuswanpas yachachinakunkuman karan jinata. Chaymi ninakuranku chay runaq tayta-mamanta wajachimunankupaq, chhaynapi ñausapunichus naceran icha manachus chayta tapunankupaq.