Fariseokuna ñausa naceq runata tapupayanku

Fariseokunaqa manan creerankuchu juj ñausa runata Jesús qhaliyachisqanta, chaymi chay runaq tayta-mamanta wajachimuranku. Paykunaqa manchakusharankun “sinagogamanta qarqosqa kayta” (Juan 9:22). Qarqosqa kaqtinkuqa llapa familianmi cheqnisqa, pisichikuypi ima tarikunkuman karan.

Chay runaq tayta-mamantan fariseokunaqa tapuranku: “¿Wawaykichischu kay runa? ¿Ñausachu pay naceran? ¿Imaynapitaq kunanri ñawin kichasqa kashan?”, nispa. Paykunataq niranku: “Arí, payqa wawaykun, ñausapunitaqmi naceranpas. Ichaqa manan yachaykuchu imaynapichus ñawin kicharikuran chaytaqa, ni pitaqchus kicharan chaytapas”, nispa. Manchakusqankuraykutaq niranku: “Paytayá tapuychis. Payqa machuñan, paymi chaytaqa willanasuykichis”, nispa (Juan 9:19-21).

Jinan fariseokunaqa chay runata wajachimuspa niranku: “Cheqaqta willakuspa Diosta jatunchay; noqaykuqa allintan yachayku chay runaqa juchasapapuni kasqanta”, nispa. Chay runataq niran: “Noqaqa manan yachanichu juchasapachus imaynachus chaytaqa, ñausa kashaspay kunan qhawashasqallaytan yachani”, nispa (Juan 9:24, 25).

Jinan fariseokunaqa tapuranku: “¿Imanarasunkitaqri? ¿Imaynatan ñawiykita kicharasunki?”, nispa. Chay runataq niran: “Ñataq niykichisña, qankunataq ichaqa mana uyariqpas tukuwankichischu. ¿Imapaqñataq wajmantari uyariyta munashankichis? Icha ¿paypa discipulon kaytachu qankunapas munashankichis?”, nispa. Jinan fariseokunaqa phiñasqa niranku: “Qanchá chay runaq discipulonqa kanki; noqaykuqa Moisespa discipulonkunan kayku. Noqaykuqa yachaykun Diosqa Moisesman rimaykusqanta, pichus chay runata kachamuran chaytan ichaqa mana yachaykuchu”, nispa (Juan 9:26-29).

Jinan chay runaqa niran: “Admirakunapaqmá kayqa, maypis mana yachawaqchischu pichus kachamuran chayta, ¿manachu chayta reparankichis ñawiyta kichawasqanpi? Yachanchismá riki Diosqa juchasapakunata mana uyarisqanta, pichus payta manchakuspa munayninta ruwaqtan ichaqa uyarin. Manamá riki jayk’aqpas ñausapuni naceqpa ñawintaqa pipas kichariranchu. Manachus kay runa Diosmanta kanman chayqa, manachá ima ruwaytapas atinmanchu”, nispa (Juan 9:30-33).

Mana imayna kutichiyta atispankutaq fariseokunaqa chay runata pisicharanku: “¿Qan juchasapapuni naceq kashaspaykichu noqaykuta yachachiwankikuman?”, nispa. Jinaspa qarqopuranku (Juan 9:34).

Chay pasasqanmanta yachaspan Jesusqa chay runata maskhaspa tapuran: “¿Iñinkichu runaq Churinpi?”, nispa. Paytaq niran: “Wiraqocha, willaway pichus pay kasqanta, chhaynapi paypi iñinaypaq”, nispa. Jinan Jesusqa niran: “Paytaqa ñan rikurankiña. Noqa rimapayaqniykin chayqa kashani”, nispa (Juan 9:35-37).

Chay runataq niran: “Iñinin, Señor”, nispa. Jinaspa Jesusman k’umuykuran. Jesustaq niran: “Noqaqa kay pachaman jamurani runakuna juzgasqa kananpaqmi, chhaynapi mana rikuqkuna rikunankupaq, rikuqkunataq ñausa kapunankupaq”, nispa (Juan 9:38, 39).

Chaypi kashaq fariseokunataq chayta uyarispa Jesusta niranku: “Chhaynaqa, ¿noqaykupas ñausachu kayku?”, nispa. Jesustaq niran: “Ñausa kawaqchis chayqa, manachá juchayoqchu kawaqchis. Qankunan ichaqa ‘rikuykun’ ninkichis, chayraykun juchallayoqpuni kashankichis”, nispa (Juan 9:40, 41). Chay fariseokunaqa kamachikuy simita allinta yachashaspankun mana Jesuspi iñirankuchu, chaymi sinchita juchallikusharanku.