Diosmi janaq pachatapas jallp’atapas ruwarqan

Diosmi kamaqninchisqa, paymi tukuyta ruwarqan. Manaraq ch’askakunata jallp’atapas ruwashaspanmi ruwarqan askha angelkunata. ¿Imataq angelkunari? ¿Yachankichu? Paykunaqa Jehová Dios jina espiritukunan kanku, chaymi mana rikunchischu. Ñaupaq kaq ruwasqan angelmi Jesús karqan. Paymi Diosta yanaparqan imaymana ruwayta. Paywanmi Diosqa ruwarqan ch’askakunata, planetakunata, jujkunatapas. Jujnin planeta ruwasqankupin noqanchisqa tiyanchis.

Chaymantan Diosqa jallp’anchista prepararqan animalkunapas runakunapas chaypi tiyanankupaq. Chaypaqmi intita k’anchachimurqan. Ruwallarqantaqmi orqokunata, qochakunata, mayukunatapas.

Chay qhepamanri, ¿iman pasarqan? Jehová Diosmi nirqan: “Ruwasaq qorakunata, plantakunata, sach’akunatapas”, nispa. Chaymi jallp’anchispi wiñamuyta qallarirqan imaymana clase frutakuna, verdurakuna, t’ikakunapas. Diosqa ruwallarqantaqmi imaymana clase animalkunata: altonta volaqkunata, unupi nadaqkunata, pampanta suchuqkunatapas. Ruwarqanmi juch’uy animalkunata jatun animalkunatapas. Qanmanri, ¿mayqen animaltaq gustasunki?

Chay qhepamanmi Diosqa ñaupaq kaq angelta nirqan: “Runata ruwasunchis”, nispa. Runakunaqa jujniraymi kanan karqan animalkunamanta. Runakunaqa atinchismi inventayta, rimayta, asikuyta, Diosmanta mañakuytapas. Runakunaqa cuidanankun karqan jallp’atapas animalkunatapas. ¿Yachankichu pin ñaupaq kaq runa karqan chayta? ¿Munawaqchu yachayta?