Sumaq huerta

¡QHAWARIY Allpata! ¡Sumaqmi imapas kashan! Qhawariy q’omer qorakunata, sach’akunata, t’ikakunata, llapa animalkunatapas. ¿Rikushankichu elefanteta, leonkunatapas maypi kasqanta?

¿Imaynatan kay huerta rikhuriran? Diosmi ruwaran ñoqanchispaq; kunanmi yachasun imayna ruwasqanta.

Ñawpaqtan Diosqa ruwaran q’omer qorakunata Allpanchis p’achasqa hina kananpaq. Chaymantan ruwaran imaymana qorachakunata, huch’uy sach’akunata, hatun sach’akunatapas. Kaykunan Allpata sumaqyachin. Ichaqa manan chayllapaqchu. Chaykunaqa rurun mikhunanchispaqwanmi.

Chaymantan Diosqa challwakunata ruwaran unupi kawsananpaq, phalaq animalkunatataq hanaq pachapi phalananpaq. Ruwallarantaqmi alqokunata, michikunata, caballokunata; hatun animalkunata, huch’uy animalkunatapas. ¿Kanchu animalkuna wasiykiq qayllanpi? ¡Munakuq Dios kaspan ñoqanchispaq kaykunata ruwaran!

Chaykunata tukuspañan Diosqa huk cheqaspi sumaqta ruwaran. Edén huerta nispan suticharan. Sumaqmi karan. Chaypiqa imapas munayllañan karan. Diosqa munaran kay sumaq huerta hina Allpantin kananta.

Hukmanta kay dibujota qhawariy. ¿Imatan Dios qhawaran kay huertapi mana kasqanta? Chaymanta kunan yachasun.