Chunka iskayniyoq qhawaqkuna

Israel runakunaqa Sinaí orqomantan Parán ladoman viajarqanku, jinan chayarqanku Cadesman. Chaypin Jehová Diosqa Moisesta nirqan: “Sapanka ayllumanta juj runata ajllay, jinaspa paykunata kachay Canaán jallp’ata qhawamunankupaq”, nispa. Jinan Moisesqa 12 runata ajllaspa nirqan: “Canaanman rispa allinta qhawamunkichis runankuna kallpayoqchus icha manachus kasqankuta, karpakunapichu icha llaqtapichu tiyasqankuta, jallp’ankupas imayna kasqantawan”, nispa. Jinan 12 runakuna Canaán jallp’ata qhawaq rirqanku, chaypin Josuepas Calebpas kasharqanku.

Qhawaqkunaqa 40 p’unchaymantan kutimurqanku. Apamurqankun higosta, granadakunata, uvasta ima. Nirqankutaq: “Canaanqa sumaq jallp’an kasqa, chaypi tiyaq runakunan ichaqa kallpayoq kanku, llaqtankuq perqankunapas jatunkaraymi kasqa”, nispa. Calebmi ichaqa nirqan: “¡Paykunataqa atipasunmi! ¡Jakuchis!”, nispa. ¿Imaraykun chayta nirqan? Paypas Josuepas Diospin confiarqanku. Chunka runakunataq nirqanku: “¡Manan risunmanchu! ¡Chay runakunaqa jatunkaraymi kanku! ¡Paykunaq ladonpiqa t’isku-t’isku otaq ch’illiku jinan kanchis!”, nispa.

Jinan Israel runakunaqa quejakuspa nirqanku: “Waj kamachiqta ajllakuspa Egiptoman kutipusun. Yanqapaqmi Canaanmanqa risunman, chaypiqa wañusunmi”, nispa. Josuewan Calebwantaq nirqanku: “Diosta kasukusun, ama manchakuychischu, pakaykuwasunmi”, nispa. Ichaqa manan kasukurqankuchu, aswanmi Josueta Calebtawan wañuchiyta munarqanku.

¿Imatan Jehová Dios ruwarqan? Moisestan nirqan: “Imaymanataña Israel runakunapaq ruwarqani chaypas, manan kasuwankuchu. 40 watan ch’inneqpi purinqaku wañunankukama. Wawankun ichaqa Josuepiwan Calebpiwan prometesqay jallp’aman jaykunqaku”, nispa.