Israelpi ñaupaq kaq rey

Jehová Diosqa juezkunawanmi Israel llaqtanta pusarirqan, runakunan ichaqa juj reyta mañakurqanku. Chaymi Samuelta nirqanku: “Llapa nacionkuna jinan reyniyoq kayta munayku”, nispa. Samuelqa manan allinpaqchu chayta qhawarirqan, jinan Diosmanta mañakurqan, Diostaq nirqan: “Kay runakunaqa manan qantachu negasunkiku, aswanpas noqatan negawanku. Paykunaman willay reyqa imaymanata mañananta”, nispa. Chaywanpas runakunan nirqanku: “¡Imapas kachun! ¡Juj reytapunin munayku!”, nispa.

Jinan Jehová Diosqa Samuelta kamachirqan Saulta ajllananpaq. Ramá llaqtaman Saúl jamuqtinmi Samuelqa aceitewan umanpi jich’aykurqan rey kananpaq.

Chay qhepamantaq Samuelqa Israel llaqtata juñurqan reyninkuta reqsichinanpaq. Saultan ichaqa mana maypipas tarirqankuchu. ¿Imarayku? Q’epikuna kasqanpi pakakusqanrayku. Saulta tarispankun runakuna rikunanpaq pusamurqanku. Payqa llapankumantapas aswan jatunmi karqan, sumaq rijch’ayniyoqtaq karqanpas. Jinan Samuelqa nirqan: “Qhawariychis Jehová Diospa ajllakusqan reyta”, nispa. Runakunataq nirqanku: “¡Kausachun reyninchis!”, nispa.

Qallariypiqa Saulqa kasukurqanmi Jehová Diosta Samueltapas. Chaymantan ichaqa manaña kasukurqanchu. Juj kutinmi Samuelqa Saulta nirqan Diosman sacrificiota jaywananpaq suyananta. Samuel mana usqhayta jamuqtintaq Saúl sacrificiota jaywarqan. Jinan Samuelqa nirqan: “Jehová Diostan kasukunayki karqan, manataqmi chaytachu ruwanki”, nispa. Chay qhepaman, ¿yacharqanchu Diosta kasukunanpuni kasqanta?

Chaymantan Saulqa Amalec runakunawan maqanakuq rirqan, Samuelmi nirqan llapankuta wañuchinanpaq. Saulmi ichaqa rey Agagta mana wañuchirqanchu. Jinan Jehová Diosqa Samuelta nirqan: “Saulqa manan kasuwanñachu”, nispa. Samuelqa sinchita llakikuspan Saulta nirqan: “Jehová Diosmi juj reyta qanpa rantiykipi ajllanqa, mana kasukuq kasqaykirayku”, nispa. Samuel ripushaqtinmi Saulqa p’achanmanta jap’iruspa p’achanta llik’irqan. Jinan Samuelqa nirqan: “Chhaynatan Jehová Diosqa rey kasqaykita qechusunki”, nispa. Chay reymi ichaqa Diosta kasukunan karqan.