Jatunkaray sach’awan tupaq gobierno

Juj tutan Nabucodonosorqa sinchi manchanata mosqokurqan, jinan yachayniyoq runakunata wajachimurqan mosqokusqanta explicanankupaq. Mana atiqtinkun Danielman willarqan.

Reymi nirqan: “Mosqoyniypin rikurqani jatun sach’ata, umanmi janaq pachakama chayarqan, mundontinpi runakunataq rikurqanku. Munay raphiyoqmi kasqa, askha ruruyoq, animalkunan llanthukuqku, phalaq animalkunapas q’esachakuqkun. Chay qhepamanmi juj ángel nirqan: Chay sach’ata wit’uychis, raphinkunatapas pallaychis. Ichaqa k’ulluntapas saphinkunatapas saqeychis fierro-bronce cadenawan watasqata. Sonqonpas cambiachun, jinaspa animal jina yuyayniyoq kachun, qanchis watantin chay jina kachun. Ancha jatun Diospa kamachikusqanta llapa runa yachananpaq. Payqa munasqan runamanmi kamachikuyta qon”, nispa.

Diosmi Danielman willarqan reypa mosqokusqanta, jinan sinchita mancharikurqan. Danielmi reyta nirqan: “Reyníy, allinchá kanman mosqokusqayki enemigoykikunawan pasaqtinqa, ichaqa qanwanmi pasanqa. Jatun sach’aqa qanmi kanki. Rey kasqaykimantan wijch’usunkiku, salqa animalkuna jinataq campopi qorata mijunki. Ichaqa angelmi willarqan sach’aq k’ullunpas saphinpas kashanallanta, chaywanmi nisharqan wajmanta rey kanaykita”, nispa.

Juj wata qhepamanmi Nabucodonosorqa palacionpa techonmanta Babilonia llaqtata qhawarispa sonqonpi nirqan: “¡May sumaq llaqtatan jatarichisqani, manan pipas noqa jinaqa kanchu!”, nispa. Chay ratupin Diospa angelnin payta nirqan: “¡Nabucodonosor! Rey kasqaykimantan wijch’usunkiku”, nispa.

Chay ratupin Nabucodonosorqa locoyapurqan, jinan rey kasqanmanta orqorqanku jinaspa animalkunawan kuska tiyarqan, paykuna jinataq q’achuta mijurqan. Chujchanpas phalaq animalkunaq rafran jina jatunta wiñarqan, sillunkunapas phalaq animalkunaq sillun jina jatunta wiñarqan.

Qanchis watamantan Nabucodonosorqa yuyayninman kutirqan, jinan Diosqa wajmanta churarqan Babiloniapi rey kananpaq. Chaymi Nabucodonosorqa nirqan: “Jehová Diostan jatunchani, kunanqa yachanin jatun kamachikuq kasqanta. Paymi jatunchakuqkunata k’umuykachin, munasqan runatataq rey kananpaq churan”, nispa.