Daniel leonkunaq t’oqonpi tarikun

Babiloniapin Darío runañataq rey karqan. Paypas repararqanmi Danielqa yachayniyoq kasqanta, jinan umalliqkunata umallinanpaq churarqan. Umalliqkunan ichaqa Danielmanta envidiakuspa wañuchiyta munarqanku. Yacharqankun Danielqa Jehová Diosman p’unchaypi kinsa kutita mañakusqanta, chaymi Dariota nirqanku: “Reyniyku juj kamachikuyta churay llapa runakuna qanllaman mañakunankupaq. Mana kasukuqtataq leonkunaq t’oqonman wijch’uykuchunku”, nispa. Jinan Darioqa chay kamachikuyta churarqan.

Danielqa yacharusqan chay kamachikuymanta, jinan wasinman rispa qonqorikuspa Jehová Diosmanta mañakurqan ventananta kichaspa. Umallikunataq Danielpa wasinman jaykuspanku rikurqanku Danielpa mañakusqanta. Chaymi Dariota nirqanku: “Danielqa manan kasukusunkichu, p’unchaypin kinsa kutita Diosninman mañakun”, nispa. Darioqa munakurqanmi Danielta, manataqmi munarqanchu wañuchinankuta. P’unchaynintinmi piensarqan imayna salvananpaq, ichaqa manan paypas firmasqan leytaqa cambiayta atirqanchu. Chaymi kamachirqan leonkunaq t’oqonman wijch’uykunankupaq.

Chay tutan Darioqa llakikuspa mana puñuyta atirqanchu. Tutamantantaq leonkunaq t’oqonman rispa alto kunkawan nirqan: “¡Daniel! ¡¿Salvarqasunkichu Diosniyki?!”, nispa.

Danielmi kutichimurqan: “Jehová Diospa angelninmi leonkunaq siminta wisq’arqan mana mijuwanankupaq”, nispa. Darioqa anchatan kusikurqan, jinan kamachirqan Danielta orqonankupaq. Leonkunaqa manan imanasqakupaschu. Chay qhepamanmi reyqa kamachirqan: “¡Danielta cheqnikuq runakunata leonkunaq t’oqonman wijch’uykuychis!”, nispa. Jinan leonkunaqa kaqpacha mijupurqanku.

Darion llaqtata kamachirqan: “Llapaykichis Danielpa Diosninta respetaychis. Paymi leonkunamanta salvarqan”, nispa.

Qanri, ¿Daniel jinachu Jehová Diosmanta sapa p’unchay mañakunki?