Jesús discipulonkunaman Diosmanta mañakuyta yachachin

Fariseokunaqa jujkunaq alabananpaq jinan imatapas ruwaqku. Diosmanta mañakuspapas plazakunapin jujkunaq rikunanpaq jina ruwaqku. Jinaspapas paykunaqa sinagogakunapi callekunapin umallankumanta unayta recitaqku runakunaq uyarinankupaq jina. Chaymi runakunaqa admirakurqanku Jesuspa nisqanwan, paymi nirqan: “Ama fariseokuna jinaqa mañakunkichischu. Jehová Diosllan uyarinan mañakusqaykitaqa. Manataq kaq simikunallatachu kuti-kutirispa rimanayki. Diosqa munanmi sonqoykipi imachus kasqanta willanaykita”, nispa.

Jinaspan mañakuyta yachachirqan, nirqanmi: “Taytayku janaq pachapi kaq, sutiyki ch’uyapaq jap’isqa kachun. Gobiernoyki jamuchun. Munayniyki kay pachapi ruwakuchun imaynan janaq pachapipas ruwakun jinata”, nispa. Jesusqa nillarqantaqmi sapa p’unchay mijunata qowananchispaq, juchanchiskunata perdonawananchispaq, jujkunamantawan mañakunata.

Jesusmi nillarqantaq: “Mañakushallaychis allin kaqkunata Taytaykichis Jehová Diosmanta. Llapa taytapas wawanmanqa allin kaqtan qoyta munan. Sichus wawayki t’antata mañakusunkiman chayqa, manan rumitachu qowaq ¿riki? Challwata mañakusuqtiykipas manan mach’aqwaytachu qowaq ¿riki?”, nispa.

Chay qhepamanmi nirqan: “Qanpas wawaykikunaman allin regalota qoyta yachanki chayqa, astawanraqmi Jehová Diosqa santo espiritunta qosunki. Chaymi mañakushanallayki”, nispa. ¿Kasukunkichu Jesuspa nisqanta? ¿Imatan Jehová Diosmanta mañakunki?