Jesús Lazarota kausarichin

Jesuspa kinsa amigonkunan Betania llaqtapi tiyarqanku. Paykunan karqanku Lázaro, Marta, Mariapiwan. Juj p’unchaymi Jesús Jordán mayuq chimpanpi kashaqtin Lazaroq hermanankunaqa juj willakuyta apachimurqanku: “Lazaron sinchi onqosqa kashan, usqhaylla jamuy”, nispa. Jesusmi ichaqa mana usqhaychu rirqan, aswanmi iskay p’unchaytawan qhepakuspa discipulonkunata nirqan: “Jaku Betaniata, Lazaron puñushan, paytan rijch’achimusaq”, nispa. Apostolkunataq nirqanku: “Puñushantaq chayqa, qhaliyanqachá”, nispa. Chaymi Jesusqa sut’inta nirqan: “Lazaroqa wañupunmi”, nispa.

Jesús Betaniaman chayaqtinqa, tawa p’unchayñan Lazaroqa wañusqa kasharqan. Askha runan Martata Mariatapas consolaq rirqanku. Martan uyarisqa Jesuspa jamusqanta, jinan payman aypaspa nirqan: “Señor, kaypi kawaq karqan chayqa, hermanoyqa manachá wañunmanchu karqan”, nispa. Jesustaq nirqan: “Hermanoykiqa kausarimpunqan, ¿creewankichu?”, nispa. Paytaq nirqan: “Yachanin kausarimpuy p’unchaypi kausarimpunanta”, nispa. Jesustaq nirqan: “Noqan kausarimpuypas kausaypas kani”, nispa.

Jinan Martaqa Mariaman willaq rirqan: “Jesusmi kaypi kashan”, nispa. Chaymi Mariaqa Jesuspa kasqanman phawarqan, runakunapas qatikurqankun. Chayaspataq pampakama k’umuykuspa, waqaykuspa nirqan: “Señor kaypi kawaq karqan chayqa, hermanoyqa manan wañunmanchu karqan”, nispa. Jesusqa rikurqanmi sonqo nanayta waqashasqanta, jinan paypas waqarqan. Chayta rikuspan runakunaqa nirqanku: “Anchatamá Lazarotaqa munakusqa”, nispa. Wakintaq nirqanku: “¿Imaraykun mana qhaliyachirqanchu?”, nispa. ¿Imatan Jesús ruwarqan?

Lazarota p’ampasqanku t’oqomanmi rirqan. Jinan kamachirqan rumita suchuchinankupaq. Martan ichaqa nirqan: “Señor tawa p’unchayñan karun, asnashanñachá”, nispa. Chaywanpas rumitaqa suchuchirqankun. Jesustaq mañakurqan: “Taytáy, gracias niykin uyariwasqaykimanta, noqaqa yachanin uyariwasqaykita, ichaqa kaypi kashaq runakuna kachamuwasqaykita yachanankupaqmi alto kunkawan mañakamuyki”, nispa. Chay qhepamanmi fuerteta nirqan: “¡Lázaro, lloqsimuy!”, nispa. Lazarotaq telawan k’uyusqa lloqsimurqan. Jesustaq nirqan: “Paskaychis”, nispa.

Chayta rikuspan askha runakuna Jesuspi iñipurqanku. Wakintaq fariseokunaman willaq rirqanku. Chaymantapachan fariseokunaqa Jesusta Lazarotawan wañuchiyta munarqanku. Judas Iscarioten pakallapi fariseokunaman rispa nirqan: “¿Jayk’atan pagawankichisman Jesusta qankunaman jap’ichiqtiy?”, nispa. Jinan 30 qolqeta paganankupaq munachirqanku. Chaymantapachan Judasqa piensarqan imaynatas Jesusta jap’ichinman chayta.