Jesús sábado p’unchaypi qhaliyachin

Fariseokunaqa cheqnikurqankun Jesusta, jap’iytataq munarqanku. Paykunaqa nirqankun: “Sábado p’unchaypiqa manan pitapas qhaliyachinanchu”, nispa. Juj sabadon Jesusqa ñausapuni naceq runawan tuparqan. Jinan discipulonkunata nirqan: “Kunanmi rikunkichis Diospa atiynin kay runata yanapasqanta”, nispa. Chaymi Jesusqa thoqayninta jallp’awan tupachispa t’uruta ruwarqan, jinaspa ñausaq ñawinta llusiykuspa nirqan: “Phaway, Siloan pozopi maqchikamuy”, nispa. Chayta ruwaqtinmi ñausa runaqa qhawaripurqan.

Jinan runakunaqa admirakuspa nirqanku: “¿Kay runachus jina qolqetaqa mañapakuq, icha paymanchu rijch’akunpas?”, nispa. Paytaq nirqan: “Noqan kashani”, nispa. Jinan tapurqanku: “¿Imaynapitaq qhawaripunkiri?”, nispa. Jinan willarqan imachus paywan pasasqanta. Chay qhepamanmi aparqanku fariseokunawan rimananpaq.

Jinan fariseokunata nirqan: “Jesusmi t’uruwan ñawiyta llusiwaspa niwarqan maqchikamunaypaq. Chayta ruwaqtiymi qhawaripurqani”, nispa. Fariseokunataq nirqanku: “Jesusqa sabadopin qhaliyachirqan, chhaynaqa manan Diospa atiyninwanchu ruwan”, nispa. Jujkunataq nirqanku: “Manachus Diospa atiyninwan kanman chayqa, manan qhaliyachinmanchu”, nispa.

Jinan fariseokunaqa tayta-mamanta wajachimuspa tapurqanku: “¿Imaynapin wawaykichis qhawaripurqan?”, nispa. Tayta-mamanqa yacharqanmi Jesuspi iñiqqa llaqtankumanta qarqosqa kananta, chaymi nirqanku: “Manan yachaykuchu, payta tapuychis”, nispa. Jinan fariseokunaqa wajmanta tapupayarqanku, chaymi payqa nirqan: “Llapantañan willaykichis, ¿imaraykun tapupayawankichis?”, nispa. Chaymi fariseokunaqa phiñakuspanku qarqopurqanku.

Jesusmi chay runaq kasqanman rispa tapurqan: “¿Mesiaspi iñinkichu?”, nispa. Paytaq nirqan: “Payta reqsispayqa iñiymanmi”, nispa. Jinan Jesusqa nirqan: “Noqan Mesiasqa kani”, nispa. Jesusqa sumaq sonqon paywan karqan ¿riki? Qhaliyachisqan qhepamanpas yanaparqanmi paypi iñinanpaq.