Jesús janaq pachaman kutipun

Galileapin Jesusqa discipulonkunawan juñukurqan. Jinaspa juj importante kamachikuyta qorqan, nirqanmi: “Riychis, jinaspa llapa llaqtakunapi discipuloykuna kanankupaq yachachimuspa bautizamuychis”, nispa. Prometerqantaq paykunawan kashanallanpaq.

Kausarimpusqanmantaqa 40 p’unchayraqmi Jesusqa kay pachapi karqan, chaypin discipulonkunaman rijurirqan Galileapi Jerusalenpi ima. Imaymanata yachachispan milagrokunata ruwarqan. Olivos orqopin Jesusqa apostolninkunawan juñukurqan, chaymantaqa manañan rijurirqanñachu. Jinaspa nirqan: “Amaraq Jerusalenmantaqa ripunkichischu. Suyakushallaychis Taytaypa prometesqanta”, nispa.

Apostolninkunaqa manan entienderqankuchu rimasqanta, chaymi tapurqanku: “¿Israelpichu kamachikuyta qallarinki?”, nispa. Jesustaq nirqan: “Jehová Diosqa manaraqmi munanchu rey kanayta. Ichaqa pisi tiempollamantan santo espirituta chaskinkichis, jinaspa testigoykuna kankichis. Chhaynaqa predicamuychis Jerusalenpi, Samariapi, kay pachaq k’uchunkama”, nispa.

Jinan Jesusqa janaq pachaman oqarisqa karqan, juj phuyutaq tapaykurqan. Discipulonkunaqa qhawashallarqankun, paymi ichaqa chinkaripurqan.

Jinaspa Olivos orqomanta Jerusalenman kutipurqanku. Chaypin altos cuartopi juñukushallarqanku Diosmantapas mañakushallarqanku ñaupaqpi ruwasqankuman jina. Suyarqankutaq Jesuspa imachus ruwanankupaq kamachimunanta.