Jesuspa kawsarimpusqan

KINSA p’unchay Cristoq wañupusqan qhepamanmi paypi iñiq warmikuna p’ampasqa kasqanman rirqanku. Chayaqtinkun p’ampasqanku t’oqota kicharayashaqta ch’usaqta tarirqanku.

Chayllamanmi iskay angelkuna rikhurimurqanku. Hukninmi nirqan: “¿Nazaret llaqtayoq Jesustachu maskhashankichis? Payqa kawsarimpunmi”, nispa (Marcos 16:6). Hinan chay warmikuna phawaylla apostolkunaman willaq rirqanku. Jesusmi paykunawan tupaspa nirqan: “Ama mancharikuychischu, riychis, wawqeykunaman willamuychis Galileaman rinankupaq, chaypin rikumuwanqaku”, nispa (Mateo 28:10).

Iskay qatikuqninkunan Jerusalenmanta Emaús llaqtaman risharqanku. Ñanpin huk mana reqsisqa runa rikhurispa tapurqan: “¿Imamanta tapunakuspan purishankichis?” nispa. Payqa Jesusmi karqan ichaqa manan reqsirqankuchu hukniray kasqanrayku. Chaymi llakisqa willarqanku Jesusmanta rimashasqankuta. Hinan chay runaqa Diospa Simin Qelqa Mesiaspi imayna hunt’akusqanmanta willayta qallarirqan. Arí, Mesiasmanta willaq profeciakunan llapallan Jesuspi hunt’akusqa.a Chaypin repararqanku espiritupi kawsarimpuq Jesuswan rimasqankuta hinan Jesusqa chinkapurqan.

Iskaynin qatikuqninkunan Jerusalenman kutispa apostolkunaman willaq rirqanku. Apostolkunaqa wasiq punkunta wisq’aykukuspan kasharqanku. Paykunaman tukuy rikusqankuta willashaqtinkutaq Jesús rikhurirqan, hinan llapallanku mancharikurqanku. Chaymi Jesús nirqan: “¿Imanaqtintaq sonqoykichispi iskayrayashankichis?”, nispa. Nillarqantaq: “Qelqasqa kasqanman hinapunin Cristoqa ñak’arinan karqan, wañuspataq kinsakaq p’unchaypi kawsarimpunan karqan”, nispa (Lucas 24:38, 46).

Jesusqa tawa chunka p’unchay ukhupin askha kutita apostolninkunaman rikhurirqan. Huk kutinpas phisqa pachak runakuna hinan rikurqanku. Yaqapaschá chaypi qatikuqninkunata kamachirqan: “Rispa llapa suyu runakunata yachachimuychis, yachachisqaykuna kanankupaq [...]. Qankunaman lliw kamachisqaykunata paykunaman yachachimuychis kasukunankupaq. Ñoqaqa qankunawanmi sapa p’unchay kashani kay pachaq p’uchukanankama”, nispa (Mateo 28:19, 20).

Qhepallataña chunka hukniyoq apostolninkunawan huñukuspan prometerqan: “Qankunaman Santo Espíritu hamuqtinmi ichaqa atiyta chaskinkichis, hinaspan testigoykuna kankichis [...] kay pachaq k’uchunkunakamaraq”, nispa (Hechos 1:8). Chay qhepamanmi hanaq pachaman ripurqan, phuyu pakaqtintaq manaña rikupurqankuchu.

(Mateo 28; Marcos 16; Lucas 24; Juan 20, 21; 1 Corintios 15:5, 6.)