Juan rijuriykunata rikun

Apóstol Juan Patmos islapi preso kashaqtinmi Jesusqa jamuq tiempomanta 16 rijuriykunata rikuchirqan. Chaypin Juanqa rikurqan imaynata Diospa sutin ch’uyanchasqa kananmanta, imaynata Diospa gobiernon jamunanmanta, imaynata Diospa munaynin kay pachapi ruwakunanmantawan.

Juj rijuriypin Juanqa rikurqan Diosta. Muyuriqninpin 24 runakuna kasharqanku yuraq p’achawan p’achasqa qori coronayoq. Diospa trononmantataq k’anchay k’ancharimurqan rayoq t’ojasqan jinataq uyarikurqan. 24 runakunaqa Diospa ñaupanpi k’umuykuspan adorarqanku. Jujpitaq rikurqan ancha askha runakunata, paykunan karqanku llapa nacionmanta rimaykunamantawan, Diostataq adorarqanku, Jesustaq michiqninku karqan, kausay unumantaq pusarqan. Juj kaqpitaq rikurqan Jesusta 24 kuraq runakunatawan kamachiyta qallarisqankuta. Qatiqninpitaq rikurqan Jesús Satanaswan supayninkunawan maqanakusqanta. Jinaspan Jesusqa kay jallp’aman wijch’umurqan.

Chay qhepamantaq rikurqan Jesusta 144.000 runakunatawan Sion orqo patapi sayashaqta. Rikullarqantaq juj angelta “Diosta jatunchaychis” nishaspa jallp’antinpi volashaqta.

Juj rijuriypitaq rikurqan Armagedón guerrata. Chay guerrapin Jesusqa ejercitonwan Satanaspa kamachisqan pachata atiparqan. Tukukuy rijuriypitaq rikurqan janaq pachapipas kay pachapipas ancha sumaq kausay kasqanta, llapankun juj nisqalla thajpi kausarqanku. Wiñaypaqmi Satanaspas qatikuqninkunapas chinkachisqa karqanku. Llapankutaq Diospa sutinta ch’uyapaq jap’irqanku, payllatataq adorarqankupas.