Diospa munayninman hina kawsasun

“Llapapaqmi Cristoqa wañurqan, kawsaqkuna amaña paykuna kikinkupaq kawsanankupaq.” (2 CORINTIOS 5:15.)

1. ¿Ima experiencian karan llank’asqan llaqtapi huk misioneropaq?

“HUK MISIONERO Aarón sutiyoq kayta yuyarin: “Suyupi maqanakuy tukupusqanmantapachan carroyku chayraq haykusharan Africapi kaq huk huch’uy aylluman.a Chaypi kaq huch’uy congregacionmantan manaña imatapas yacharaykuchu, chaymi yachayta munarayku wayqe panakunaq imakuna necesitasqanmanta. Aparaykun mikhunata, p’achata, qelqakunata, Los testigos de Jehová... la organización tras el nombre nisqa videotawan.b Chaytan chay ayllupi kaq ‘cine’ nisqapi churarayku, —chay cine nisqaqa karan huk hatun ch’ukllan, chaypin karan huk televisión videota qhawanapaq— askha runakuna hamusqanrayku iskay kutita churarayku. Sapa tukusqan qhepamanmi Bibliamanta estudiota munachiqtiyku askha runakuna munaranku. Arí, kallpachakusqaykuqa manan yanqapaqchu karan”, nispa.

2. a) ¿Imaraykun cristianokuna Diospa munayninta ruwayta munanku? b) ¿Ima tapuykunatan kutichisun?

² ¿Imaraykun Aaronpas puriqmasinkunapas chay sasa llank’ayta ruwaranku? Chay cristianokunaqa Jesuspa sacrificakusqanmanta agradecekuspan Jehová Diosman qokuranku, paypa munayninman hinataq kawsayta munaranku. Paykuna hinan llapa cristianokunapas ‘manaña ñoqanchis kikinchispaqchu kawsanchis’, aswanmi ‘tukuy chaykunataqa [...] allin willakuykunarayku ruwanchis’ (2 Corintios 5:15; 1 Corintios 9:23). Yachasqanchis hina, qhapaq kaypas kay pachapi allin qhawarisqa kaypas manañan imapaqpas valenqañachu kay pacha p’uchukapuqtinqa. Chayraykun Diospa munayninman hina kawsananchis qhaliña onqosqaña tarikushanchis chaypas (Eclesiastés 12:1). ¿Imatan ruwasunman chay hinata kawsanapaq? ¿Iman kallpachawasunman Diospa munayninta ruwanapaq? ¿Imakunapin llank’asunman?

Imakunatan hunt’ana

3. Willay imakunatan ñawpaqta ruwana Diospa munayninta ruwanapaq.

³ Cheqaq cristianokunaqa Diospa munayninta wiñaypaq ruwananchispaqmi compromisota ruwanchis. Ñawpaqtaqa, Bibliamanta allin Yachachiq kanapaq Escuelapin matriculakuna, sapa p’unchay Bibliata ñawinchana, predicaq lloqsina, chaymantataq bautizoman aypana. Iñiyninchispi wiñasqanchisman hinan apóstol Pabloq nisqanta yuyarinallanchispuni: “Chaykunataqa makillapuni ruway, chaykunaman k’askakuy [otaq chaykunapi yuyaymanay], ahinapin iñiypi wiñasqaykita lliwpas sut’ita rikunqaku” (1 Timoteo 4:15). Espiritualpi wiñasqanchisqa manan hatunchakunapaqchu aswanmi tukuy sonqowan Diospa munayninta ruwanapaq decidekusqanchista rikuchinapaq. Wiñasqanchispin rikuchinchis tukuy ruwasqanchispi Jehová Dioswan pusachikusqanchista. Llapallanchismi yachanchis paylla aswan allinta pusawananchista (Salmo 32:8).

4. ¿Imaynatan manchakuyninchista atipasunman?

⁴ Iskayaymi, kikinkumanta sinchita llakikuymi cristianokunata hark’anman espiritualpi wiñananta (Eclesiastés 11:4). Chayrayku ñawpaqtaraq manchakuyninchista atipananchis Diostapas runamasinchistapas kusisqa sonqowan servinapaq. Erik sutiyoq cristianon huk simita rimaq congregacionpi yanapakuyta munasharan. Ichaqa sapa kutinmi kayta tapukuq: “¿Yachakusaqchu? ¿Yachakusaqchu wayqe panakunaman? ¿Yachakunqakuchu paykunapas ñoqaman?” nispa. Pay yuyarin: “Chay qhepamanmi kayta yuyaykurani, manan ñoqallapichu yuyaykunay wayqe panaykunapin ñawpaqtaqa yuyaykunay, nispa. Chaymi chaykunapi llakikushanaymantaqa decidekurani atisqayman hina hukkunata yanapanaypaq. Diosmanta mañakurani yanapawananpaq, yuyaykusqayman hinataq ruwarani. Chay yuyaykusqayqa allinpunin karan. Anchatan kusikuni chaypi yanapakusqaymanta” (Romanos 4:20). Arí, Diostapas runamasinchistapas tukuy sonqowan servispan aswan kusisqa kasunchis.

5. Diospa munayninman hina kawsayta munaspaqa ¿imarayku ñawpaqta imatapas allichakuna? Huk ejemplota willay.

⁵ Diospa munayninman hina kawsanapaqqa ima ruwananchistapas allintan allichakunanchis. Manan pimanpas manuchu kana, manu kayqa toqlla hinan kay pachaman aysaykuwasunman hinaspa Diospaq pisita llank’asunman. Biblia anyawanchis: ‘Manuqqa manukuqninkunatan kamachin’, nispa (Proverbios 22:7). Chayrayku ima yuyaykusqanchistapas allinta ruwanapaqqa Jehová Diosmanmi hap’ipakunanchis paypa munaynintataq ñawpaqta ruwananchis. Chaypaq yachasun Guoming cristianomanta. Paymi iskaynin panankunawan mamanta uywanku, tiyasqanku cheqaspiqa sinchita wasikuna valen, sasan llank’ana tariypas. Mayninpi manaña llapankupaqchu llank’ana kan chaypas llapallankun gastokunawan yanapanakunku pisi pisimantataq ima kaqninkutapas aypachikunku, chhaynapin ima necesitasqankupas kallanpuni. Guoming nillantaq: “Mayninpiqa pisillan qolqeyku, chaywanpas precursor kayniykutaqa manan saqeykuchu mamaykutapas sumaqtan uywayku. Payqa manan munanchu saqenaykuta precursor kasqaykuta congregacionpi ruwanaykutapas, chayrayku mana imatapas sinchitaqa mañawankuchu, chaymi anchata agradecekuyku”, nispa (2 Corintios 12:14; Hebreos 13:5).

6. ¿Ima experiencian rikuchin Diospa munayninman hina kawsayninchista t’ikray atisqanchista?

⁶ Kay pachapi ruwaykunawan —negociokunawan otaq ima ruwaykunawanpas— nishuta atipachikushanchis chayqa astawanmi kallpachakunanchis kanqa Diospa munayninman hina kawsananchispaq. Chaytaqa manan huk p’unchayllapichu atisunman, chayrayku kallpachakushaqtinchis pantasunmanraq chayqa manan ninanchischu, manan atiymanchu, nispaqa. Chaypaq qhawarisun Koichi runamanta, payqa nishutan pukllayllaman qokuq. Wayna kashaspa Bibliata estudiaran chaypas videopi pukllaywanmi payqa askha watakuna atipachikuran. Huk kutinmi kayta tapukuran: “¿Imatataq ruwashani? Kinsa chunka wataypi hinañan kashani manataqmi imapas ruwasqay kanchu”, nispa. Payqa wakmanta Biblia estudiayta qallariran congregacionpi wayqe panakunawantaq yanapachikuran. Unaypiña kawsayninta t’ikraran chaypas manan sayk’uranchu. Diosmanta mañakusqan, wayqe panakuna munakuywan yanapasqanku iman kallpacharan pukllaq kayninta saqepunanpaq (Lucas 11:9). Kunanqa kusisqan kashan congregacionpi siervo ministerial kasqanmanta.

Allin yuyaykuq kasun

7. ¿Imarayku allin yuyaykuq kananchis Diospa munayninta ruwanapaq?

⁷ Tukuy atisqanchisman hinan Jehová Diospa munaynintaqa ruwananchis. Diospa munayninta hunt’anapaqqa manan kallpanchista mich’akunachu nitaq qellakunachu (Hebreos 6:11, 12). Chaywanpas Jehová Diosqa manan munanchu sinchi sayk’usqa kananchiskama imatapas ruwananchista. Diospa yanapaynillanwan munaynin ruway atisqanchista reqsikuqtinchismi rikuchinchis allin yuyaykuq kasqanchista astawanqa Jehová Dios hatunchasqanchista (1 Pedro 4:11). Jehová Diosmi kallpata qowanchis munayninta ruwanapaq ichaqa manan imatapas mana atinanchiskamaqa ruwanachu (2 Corintios 4:7). Diospa munayninta mana sayk’uspa ruwashanallapaqqa allin yuyaywanmi imatapas ruwana.

8. ¿Imaynapin tarikuran huk cristiana Jehová Diospaq paypaqpas sinchita llank’aspa, imatan ruwaran kawsasqanta t’ikrananpaq?

⁸ Asia oriental nisqapi tiyaq Ji Hye precursoran llank’ananpi iskay wata hunt’a sinchita sayk’usqa. Paymi nin: “Sinchitan llank’arani Jehová Diospaq ñoqapaqpas, ichaqa phisqa horallatan puñurani. Sinchi sayk’usqan tarikurani. Chayrayku Diospa munaynintapas mana kusisqachu ruwarani”, nispa. ‘Tukuy sonqonwan, tukuy almanwan, tukuy yuyayninwan, tukuy kallpanwan ima’ Diospa munayninta ruwananpaqmi pisi tiempo llank’anata maskharan (Marcos 12:30). Kayta nillantaq: “Familiaymi munaran qolqesapa kanayta, ñoqan ichaqa Diospa munayninta ñawpaqta ruwayta munarani. Llank’asqaypi qolqe tarisqayqa aypawanmi kawsanaypaq, rantikushaniraqmi sumaq p’achakunatapas. ¡Hunt’asqa puñusqaywanpas aswan qhalin kashani! Kunanqa kusisqan Diospa munayninta ruwani, astawanmi Diosmanpas hukllachakuni. Kay pachaq ruwayninkunapi munapayayninkunapipas manaña tiempoyta usuchisqayrayku”, nispa (Eclesiastés 4:6; Mateo 6:24, 28-30).

9. ¿Imaynatan runakunata yanapasunman predicasqanchiswan?

⁹ Manan llapanchischu precursor kayta atisunman. Sichus yuyaqña kasqaykiwan, onqosqa kasqaykiwan, ima sasachakuykunapipas tarikusqaykiwan mana munasqaykiman hinachu Diospa munayninta ruwashanki chayqa ama llakikuychu. Jehová Diosqa kusikunmi kasukuq kasqaykimanta atisqaykiman hina tukuy ruwasqaykimantapas (Lucas 21:2, 3). Hinaspapas pisitaña llank’asunman chaypas, manan pisipaqchu qhawarina predicasqanchiswan runakuna yanapasqanchista. Yaqapaschá predicasqanchispi runakuna mana uyariwasunchu. Ichaqa yaqapaschá chay runakuna qhepaman otaq iskay kinsa p’unchay qhepaman rimashallanqaku predicaq risqanchismanta. Manaña llapankuchu Reinomanta willakuykunata uyarinqaku chaypas wakinqa uyarikunqan (Mateo 13:19-23). Wakin runakunaqa imapi tarikuspapas otaq kay pachapi imapas kasqanta rikuspan qhepaman uyarikunkuman. Imaynaña kaqtinpas tukuy atisqanchista ruwaspan Diospa munayninta ruwashanchis. Hinaspapas “Diospa llank’aysiq-masinkunan” kanchis (1 Corintios 3:9).

10. ¿Imatan llapa iñiqkuna ruwasunman?

¹⁰ Hinaspapas llapallanchismi familianchista iñiqmasinchiskunatapas yanapasunman (Gálatas 6:10). Ruwasqanchismi paykunata qhepaman kawsayninkupi yanapanman (Eclesiastés 11:1, 6). Ancianokunapas siervo ministerialkunapas llank’anankuwan hunt’asqankuwanmi congregacionta allinta takyachinku iñiqkunatapas kallpachanku, chaywantaqmi Diospa llaqtanpi llank’ay astawan wiñarin. Biblia niwanchis ‘Señorpa llank’ananpi aswan-aswanta llank’asqanchis [...] mana yanqapaqchu kasqanta’ (1 Corintios 15:58).

Diospa munayninman hina munasqanchis kachun

11. Congregacionpi yanapakusqanchismantapas ¿imakunapiwanmi llank’aysikusunman?

¹¹ Cheqaq cristianokunaqa ancha chaninpaqmi kawsayta qhawarinchis, Diosta hatunchanapaq hinataqmi kawsayta munanchis (1 Corintios 10:31). Sichus predicayninchispi, runamasinchista yachachiypipas astawan kallpachakusun chayqa astawanmi llank’ayninchista mast’arisun (Mateo 24:14; 28:19, 20). Yanapasunmanmi maypichus pisi predicaqkuna kasqanpi: huk llaqtakunapi, huk simita rimaq congregacionpi, otaq huk suyupi. Soltero ancianokuna siervo ministerialkunapas Escuela de Entrenamiento Ministerial nisqamanmi rinkuman, hinaspa huk llaqtapi otaq huk suyupi poqosqa cristianokunata necesitakusqan congregacionpi yanapakunkuman. Casarasqa cristianokunapas precursor kashanku chayqa rinkumanmi Escuela de Galaad nisqaman misionero kanankupaq. Hinaspapas necesitakushallanpunin Betel wasipi llank’aqkunata, yupaychana wasikunata sucursalkunatapas hatarichiypi allichaypi llank’aqkunatawan.

12, 13. a) ¿Iman yanapasunki Diospa llaqtanpi huk llank’ayta akllakunaykipaq? b) Willay imaynatan Diospa llaqtanpi imapas ruway yachasqanchis yanapawasunman huk llank’aypi yanapakunapaq.

¹² ¿Ima llank’aytan akllakunki? Jehová Diospa kamachintaq kanki chayqa paypa nisqanman hina, llaqtanpa nisqanman hina imatapas ruway. Diospa ‘allin espiritunmi’ yanapasunki ima llank’aytapas akllakunaykipaq (Nehemías 9:20). Diospa llaqtanpi imapas ruway yachasqaykin yanapasunki huk llank’aypi yanapakunaykipaq.

¹³ Chaypaq Dennis, Jenny casarasqa cristianokunamanta yachasun, paykunaqa Yupaychana Wasikunata hatarichiypin llank’anku. Estados Unidos suyupi uray ladopi kaq llaqtakunamanmi chayaran Katrina sutiyoq hatun muyuq wayra, chaymi paykuna riranku chaypi tiyaqkunata yanapaq. Dennis willakun: “Yupaychana wasikunata ruwaspa yachasqaykuwanmi wayqe panakunata yanaparayku, chaywanmi anchata kusikurayku. Sonqoykutan suwawaranku agradecekuspa. Yaqa llapa yanapakuq t’aqa runakunaqa pisitan yanaparanku wasi hatarichiypi. Jehová Diospa testigonkunan ichaqa hatarichiykuña phisqa waranqa kinsa pachak wasikunata Yupaychana Wasikunatawan wakintataq allichayku. Chayta rikuspan runakuna astawan uyarikunku Reinomanta willasqaykuta”, nispa.

14. ¿Imakunatan ruwanayki precursor kanaykipaq?

¹⁴ ¿Manachu kunanmantapacha precursor kawaq? Chaypas Diospa munayninta hunt’aymi. Chayta ruwaspaqa askha saminchaykunatan chaskiwaq. Manaraq kunan atiwaqchu chayqa kallpachakuy qhepaman atinaykipaq. Nehemías hina Diosmanta mañakuy, paypas huk sasa llank’ayta qallarinanpaqmi khaynata mañakuran: “Señor Diosníy, uyariykuway mañakusqayta [...]. Yanapaykuway kunan p’unchay reypa allinta qhawariwananpaq”, nispa (Nehemías 1:11). Chaymantataq ‘mañakusqata Uyariq’ Diospi qaqata hap’ipakuspa mañakusqaykiman hina ruway (Salmo 65:2). Kayta yuyariy: Reinopaq astawan llank’asqaykipi Jehová Dios saminchanasuykita munanki chayqa ñawpaqtan qan kallpachakunayki. Precursor kanaykipaq decidekunkiña chayqa ama imawanpas hark’achikuychu. Pisi pisimantan aswan allinta yachanki chaywantaq kusisqa kanki.

Sumaq kawsay

15. a) ¿Imaynatan yanapawanchis askha wataña Diospa munayninta ruwaqkunaq kawsayninmanta yachasqanchis? b) Kallpachasqasuyki experienciamanta willay.

¹⁵ ¿Iman qanpaq qhepaman kanman Diospa munayninman hina kawsasqaykimanta? Askha wataña Diospa munayninta ruwaq cristianokunawan parlay astawanqa precursor kaqkunawan. ¡Ancha sumaqmi paykunaq kawsayninqa! (Proverbios 10:22.) Paykunan willasunki imaynatan tukuy tiempo Jehová Dios yanaparan, sinchi sasachakuykunapi tarikushaqtinku tukuy ima necesitasqankutapas qosqanta (Filipenses 4:11-13). 1955 watamantapacha 1962 watakaman La Atalaya revistapi lloqsimuran hunt’aq sonqo wayqe panakunaq experiencian, kaymi titulon karan “Siguiendo tras mi propósito en la vida”. Chaymantapachan askhaña lloqsimun wayqe panakunaq kawsayninmanta willaykuna. Chay willaykunapin rikukun wayqe panakuna Dios sonqo kasqankuta kusisqa kasqankutapas Hechos qelqapi willakusqan hina. Chay wayqe panakunamanta yachaspa ninkichá: “¡Ñoqapas chay hinatan kawsayta munani!” nispa.

16. ¿Imatan cristianokuna ruwanan kusisqa kawsanankupaq allin kawsayniyoq kanankupaqpas?

¹⁶ Yuyarisunchis Aarón cristianomanta, paymi nin: “Africapin askha waynakunata reqsirani, paykunan suyuntinpiña purisqaku imapaq kawsasqankuta yachayta munaspa, ichaqa manan tarirankuchu maskhasqankuta. Ñoqaykun ichaqa, Jehová Diospa munayninta ruwaqkuna, yachayku imapaq kawsasqaykuta kusisqataqmi kaykupas. Kunanmi kayta yachayku, aswan kusikuymi kan qoypi chaskiymantaqa”, nispa (Hechos 20:35).

17. ¿Imarayku Diospa munayninman hina kawsananchis?

¹⁷ ¿Qanri imata ruwanki? Sichus Diospaq llank’asqaykipi metakunata mana churakunkichu chayqa kay pachapi kaq metakunawanmi atipachikunki. ¿Imapaqmi Satanaspa kamachikusqan pachapi mana valeq ruwaykunawan kawsayniykita usuchiwaq? As pisi tiempomanta ‘manchay ñak’ariy’ qallariqtin manañan imapaqpas valenqachu qhapaq kaypas allin qhawarisqa kaypas. Jehová Dioswan allinpi kaymi astawan valenqa. ¡Anchatachá kusikusun Jehová Diosta runamasinchistapas servisqanchismanta, Diospa munayninman hina kawsasqanchismantapas! (Mateo 24:21; Apocalipsis 7:14, 15.)

[Uranpi willakuykuna]

¿Kutichiwaqchu?

• ¿Imaynatan Jehová Dios qhawarin paypa munaynin ruwasqanchista?

• ¿Imaynatan ñawpaqmanta allichakuypas allin yuyaykuq kaypas yanapawasunman Jehová Diosta runamasinchistapas servinapaq?

• ¿Imakunapin Jehová Diospaq llank’asunman?

• ¿Imatan ruwananchis kusisqa kawsananchispaq?