Diosman Achhuykuy
Huk michiqmi sapankanchispi interesakun
“¿DIOS ñoqapi interesakunmanchu?” Hayk’aqllapas chhaynata tapukurankichu, ichaqa manan qanllachu chaytaqa tapukunki. Sasachakuypi tarikuspaqa askhan kayta tapukunchis: ¿Reparashanmanchu teqsimuyu Kamaq chhaynapi tarikusqayta? nispa. Yachaytapunin munanchis sichus Dios sapankanchispi interesakushan chayta. Jesusqa Jehová Diosta allintapuni reqsin, chaymi kay Hallp’api kashaspa huk sumaq rikch’anachiyta willaran runakunapi interesakusqanta rikuchinanpaq.
Sapa p’unchay ovejakuna michiqmanta rimaspan, Jesús niran: “¿Ima niwaqchistaq? Pachak ovejayoq runaq huk ovejan chinkaqtinqa, ¿manachu isqon chunka isqonniyoq ovejata orqoman saqeykuspa chay chinkaq oveja maskhaq puririnman? Cheqaqtan niykichis, chay chinkasqa ovejanta tarimuspanmi astawanraq kusikunqa mana chinkasqa isqon chunka isqonniyoq ovejanmantaqa. Chay hinallataqmi hanaq pachapi kaq Yayaykichispas mana munanchu kay huch’uykunamanta huknillanpas chinkanantaqa”, nispa (Mateo 18:12-14). Chay rikch’anachiypi Jesuspa willasqanman hina reparasun imaynata Jehová Dios sapanka kamachinkunapi interesakusqanta.
Oveja michiqqa sapanka ovejankunapin interesakuq. Huknin chinkaqtinqa allintan reparaq mayqen oveja chinkasqanta. Sapanka ovejakunatan sutinmantakama waqyaq (Juan 10:3). Munakuq michiqqa tarinankaman chinkasqa ovejata maskhaq. Ichaqa chay chinkasqa ovejanta maskhananpaqqa manan hinallatachu saqerpariq isqon chunka isqonniyoq ovejankunataqa. Oveja michiqkunaqa kuskallan michiqku, chaymi ovejankunapas chhaqrukuqku.a Chhaynapin chinkaq ovejata maskhaqqa michiqmasinman saqeq wakin ovejankunata michipunanpaq. Chinkaq ovejanta mana k’irisqata tariruspataq anchata michiqqa kusikuq. Rikranpi q’epiykukuspan hukmanta tropaman kutichiq (Lucas 15:5, 6).
Jesusqa rikch’anachiymanta rimaspa niran: Diosqa manan munanchu “kay huch’uykunamanta huknillanpas chinkanantaqa”, nispa. Jesusqa willaranña yachachisqankunaman, pipas “ñoqapi iñiq kay huch’uykunamanta hukninta huchaman urmachiqqa” mana allinpi tukunqa nispa (Mateo 18:6). Chhaynaqa, ¿imatan kay rikch’anachiy simi Jehová Diosmanta yachachiwanchis? Diosqa anchata interesakun sapanka kamachinkunapi, runaq qhawarinanpaq mana valeq ‘huch’uykunamantapas’ interesakunmi. Arí Jehová Diosqa ancha sumaqpaqmi qhawarin sapanka kamachinkunata.
Sichus yachaytapuni munanki Dios qanpi interesakusqanta chayqa, astawan reqsiy Ancha Allin Michiq Jehová Diosta, yachaytaq imaynata payman achhuykuwaq chaytapas. Chayta ruwaspaqa apóstol Pedro hinan yuyaykunki, paymi Jesuspa siminmantapuni uyariran chinkasqa ovejamanta rikch’anachiy simita. Qhepamanmi, apóstol Pedro kayta qelqaran: “Tukuy llakikuyniykichista Diosman saqeychis, paymi qankunataqa cuidashasunkichis”, nispa (1 Pedro 5:7).
[Uranpi willakuy]
a Michiqkunapaqqa manan sasachu karan ovejankunata t’aqay, ovejakunaqa allintan reqsiqku michiqninpa kunkanta (Juan 10:4).