Kay revista leeqkunaq tapukuynin
¿Jehová Diospa testigonkuna paykunalla salvasqa kanankupaqchu piensanku?
Jehová Diospa testigonkunaqa creeykun cheqaq religionpi kasqaykuta. Mana chayqa ñachá imapi creesqaykuta cambiaykumanña karan. Huk religionkuna hinan Jehová Diospa testigonkunapas suyakushayku salvasqa kayta. Ichaqa manan ñoqaykumanchu tupawanku pikunachus salvasqa kanqaku chayta niyqa. Aswanmi chayqa tupan llapa runakunaq Jueznin Diosllaman (Isaías 33:22).
Salvasqa kanapaqqa manan “salvasqa kaytan munani” niyllachu; aswanmi Jehová Diospa munayninta ruwana, paymi Salvawaqninchisqa. Chayta allinta entiendenapaq huk onqosqa runamanta yachasun. Chay runaqa sinchi onqosqas kashan, ¿imatan pay ruwanan chay onqoy mana wañuchinanpaq? ¿Hinallachu kanan wasinpi imaymana hampichakunawan hampikuspa, icha huk doctorpa imachus nisqantachu kasukunan? Doctortan kasukunan riki, mana kasukuqtinqa wañupunmanpaschá.
Chhaynallatataqmi ruwana salvasqa kanapaqqa, Jehová Diospa imakunachus nisqantan kasukuna chhaynapin pay kikin salvawasun. Chaymantapas Jehová Diosqa llapa runakuna salvasqa kanantan munan, ichaqa manan llapankuchu salvasqa kanqaku. Jesús kikinmi chaymanta rimashaspa niran: “Manan llapa ‘¡Señor! ¡Señor!’ niwaqniychu hanaq pacha qhapaqsuyumanqa haykunqa, aswanpas hanaq pachapi kaq Yayaypa munayninta ruwaqllan haykunqa”, nispa (Mateo 7:21).
Chaymantapas Jehová Diospa testigonkunaqa Jesuspa wañusqanpi iñiqkunalla, paypa llapa yachachisqanman hina kawsaqkunalla salvasqa kanankupin creeyku (Hechos 4:10-12). Chaymi kunan yachasunchis salvasqa kanapaq imakunatawan ruwanamanta.
Ñawpaqtaqa Jesuspa kamachisqantan kasukuna, paymi niran: “Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:35). Hukkunarayku wañusqanwanmi Jesusqa rikuchiran runamasinchista munakuyqa allinpuni kasqanta. Chaymi salvasqa kanapaqqa tukuy sonqowan runamasinchista munakunanchis.
Chaymantapas Diospa sutintan hukkunaman willananchis. Jesuspas chaytan ruwaran, huk kutinmi Taytanmanta mañakushaspa niran: “Paykunamanmi sutiykita willarani”, nispa (Juan 17:26, Reina Valera, 1960). Chaymantapas nillarantaqmi: “Sutiyki yupaychasqa kachun”, nispa (Mateo 6:9). ¿Imaynatan chayta ruwasunman? Diospa sutinta yupaychanapaqqa allintan chay sutita reqsina, santota hinataq qhawarinapas. Chaymi salvasqa kayta munaqqa Jesús hina Diospa sutinmanta rimanan. Chaymantapas hukkunamanmi yachachinan Diospa sutinta, Dios imayna kasqantawan (Mateo 28:19, 20). Bibliapunin nin: “Pipas Señorpa sutinta waqyakuqqa qespichisqan [otaq salvasqan] kanqa”, nispa (Romanos 10:13).
Chaymantapas Diospa Gobiernonpin confiananchis. Jesuspas chaytan ruwaran, chaymi huk kutin Poncio Pilatota niran: “Qhapaqsuyuyqa [otaq gobiernoyqa] manan kay pachamantachu”, nispa (Juan 18:36). Diosmi churaran Jesusta paypa rantinpi gobiernananpaq, kay pachapi runakunan ichaqa mana confiankuchu chay gobiernopi. Aswanmi paykunaqa kay pacha gobiernokunapi confianku. Salvasqan ichaqa kanqaku Diospa gobiernonpi confiaqkunalla, imaynatachus Dios serviqninkunata salvanqa, chaykunamanta yachachiqkuna imalla (Mateo 4:17).
Salvasqa kanapaq imakunachus ruwana kasqanta Jesuspa willasqan qhepallamanmi discipulonkunaqa payta tapuranku: “¿Pillañataq qespichisqaqa kanman?” nispa. Chaymi Jesusqa paykunata niran: “Runakunapaqqa mana atinan, Diospaqmi ichaqa atikun”, nispa (Lucas 18:18-30). Chaymi Jehová Diospa testigonkunaqa salvasqa kayta munasqaykurayku kallpachakuyku Diospa munasqanman hina kawsanaykupaq, runamasiykutapas yachachimuykun chayta ruwanankupaq.