¿Imaynatan Jesús salvawanchis?
¿Imaninmi Biblia?
Jesusqa vidantan qorqan Diospaq jina kausaq llapa runakunata salvananpaq (Mateo 20:28). Chaymi Bibliaqa Jesusmanta nin: “Kay pacha runakunata salvaq”, nispa (1 Juan 4:14). Chaymantapas nillantaqmi: “Payllan salvawaqninchisqa; kay pachapiqa manan pitapas Diosqa ajllarqanchu salvawananchispaq, aswanpas payllatan ajllarqan”, nispa (Hechos 4:12).
Jesusqa wañurqan paypi llapa iñiqkunaraykun (Hebreos 2:9; Juan 3:16). Chay qhepamanmi ichaqa Jehová Diosqa wañusqanmanta kausarichimpurqan, jinan Jesusqa cieloman kutipurqan espíritu cuerpopi (Hechos 3:15). Chaymi kunanqa Jesusqa cielomantapacha atin llapa paypa sutinpi Diosmanta mañakuqkunata salvayta. Jinaspapas Jesusqa wiñaypaqtaq kausanqa chayqa, atinqan paykunapaq Diosmanta rogapuyta (Hebreos 7:25).
¿Imanaqtinmi Jesuspa yanapayninta necesitanchis?
Biblian willan llapa runakuna juchayoq kasqanchista (Romanos 3:23). Chay jucharaykun llapanchispas wañunchis, chay juchan Diosmantapas t’aqawanchis (Romanos 6:23). Ichaqa Jesusmi “yanapaqninchis”, payqa yanapan wañusqanpi llapa iñiqkunatan (1 Juan 2:1). Jesustaq noqanchisrayku wañuypi vidanta entregarqa chayqa, atinmi noqanchispaq favorninchispi Diospa ñaupanpi rimayta, chhaynapi mañakusqanchista Dios uyariwananchispaq, juchanchismantapas perdonawananchispaq (Mateo 1:21; Romanos 8:34). Diosqa Jesuspa chay rogakusqantaqa uyarinmi paypa munayninman jina mañakusqanrayku. Diosqa wawan Jesusta kay jallp’aman kachamurqan “kay pacha runakuna paywan salvasqa kanankupaq” (Juan 3:17).
¿Jesuspi iñispallachu salvasqa kasunchis?
Jesuspi iñinchisña chaypas manan chayraykuchu salvasqa kasunchis. Chhaynaqa, ¿imatawanmi ruwananchis salvasqa kananchispaq? (Hechos 16:30, 31). Biblian nin: “Imaynan mana espirituyoq cuerpoqa wañusqa kashan, chhaynallataqmi iñiyninchiswanpas kanman; manachus allin kaqkunata ruwasun chayqa, wañusqan iñiyninchisqa kashanman”, nispa (Santiago 2:26). Kaykunatan ruwananchis salvasqa kananchispaq:
Jesusmanta Taytan Jehová Diosmantawanmi allinta yachananchis (Juan 17:3).
Jesuspi Jehová Diospi iman iñinanchis (Juan 12:44; 14:1).
Iñisqanchistan rikuchinanchis kamachikuyninkunata kasukuspa (Lucas 6:46; 1 Juan 2:17). Kikin Jesusmi nirqan: “Manan llapa, ¡Señor! ¡Señor!, niwaqniychu janaq pacha gobiernomanqa jaykunqa, aswanpas janaq pachapi kaq Taytaypa munayninta ruwaqllan”, nispa (Mateo 7:21).
Ima problemapiña tarikuspapas kallpachakushanallanchismi iñiyniyoq kasqanchista rikuchinanchispaq. Jesusmi nirqan: “Tukukuykama aguantaqmi ichaqa salvasqa kanqa”, nispa (Mateo 24:13).