¿Jesuschu tukuy atiyniyoq Dios?
¿Imaninkun runakuna?
▪ Askhan ninku: “Arí, Jesusqa Diospunin”, nispa.
▪ Nillankutaqmi: “Jesusqa Diosmi, paymi runaman tukuspa hamuran”, nispa.
¿Imaniranmi Jesús?
▪ Jesusqa yacharanmi papan kuraq kasqanta, chaymi niran: “Munakuwaspaykichisqa q’ochukuwaqchismi ‘Yayaman risaq’ nisqaymantaqa. Yayaqa ñoqamanta aswan kurakmi”, nispa (Juan 14:28).
▪ Nillarantaqmi: “Ñoqan wichashani Yayayman Yayaykichisman, Diosniyman Diosniykichisman”, nispa (Juan 20:17). Chay nisqanwanmi rikuchisharan mana paychu Dios kasqanta.
▪ Chaymantapas, payqa Taytanpa yachachisqallantan yachachiran, chaymi niran: “Manan ñoqaqa kikillaymantachu rimani, aswanpas kachamuwaqniy Yayan kamachiwarqan imaynatachus rimanayta imatachus ninaytapas”, nispa (Juan 12:49).
JESUSQA manan hayk’aqpas: “Tukuy atiyniyoq Diosmi kani”, nispaqa niranchu. Aswanmi payqa Diospa wawanmanta reqsichikuran. Dios kanman karan chayqa, ¿pimantan mañakunman karan kay pachapi kashaspa? (Mateo 14:23; 26:26-29.) Icha, ¿yanqallachu mañakusharanpas? Manapunin payqa chaytaqa ruwanmanchu karan.
Chaymantapas payqa yacharanmi Papallan tukuy atiyniyoq kasqanta, chaymi iskay apostolninkuna: “Kamachikushaspayki hukniykuta paña ladoykipi, hukniykutataq lloq’e ladoykipi tiyaykachiwayku”, nispa niqtinku, niran: ‘Paña ladoypi lloq’e ladoypiwan tiyaykunaykichisqa manan ñoqaq tiyaykachinaychu, aswanpas Yayaypa akllasqankunapaqmi chay tiyanakunaqa’, nispa (Mateo 20:23). Rikusqanchis hina, Papallanmi chaykuna akllaqqa karan, manan Jesuschu. Chaymantapas Jesusqa willallarantaqmi wakillanta paypas angelkunapas yachasqankuta, Papallan tukuy imaymana yachaq kasqantawan (Marcos 13:32).
Rikusqanchis hina, Jesusqa manan Dioswan igualchu karan. Ichaqa, ¿runa hina kashaspallachu chhayna kanman karan? Manan. Jesusqa hanaq pachaman kutipuspapas Diospa kamachillantan ruwasharan. Chaymi apóstol Pablo niran: ‘Diosmi Cristoq umanqa’, nispa (1 Corintios 11:3). Payqa nillarantaqmi: “Tukuy imaymanapas Cristowan munaychachisqa kaqtintaq, kikin Cristopas Churi kashaspa tukuy imaymanata paywan munaychachiq Dios Yayaman kasukunqa. Ahinapin Diosqa llapa imaymanapipas runakunapipas payllapuni munaychakunqa”, nispa (1 Corintios 15:28).
Kunan yachasqanchis hina, Jesusqa manan tukuy atiyniyoq Dioschu. Chaychá Papanmanta rimashaspa askha kutipi “Diosniymi”, nispa niran (Apocalipsis 3:12; Efesios 1:17).a
[Uranpi willakuy]
a Chaykunamanta astawan yachayta munanki chayqa, ¿Imatapunin Biblia yachachin? nisqa librota qhawariy 201 paginamanta 204 paginakama; chay librotaqa Jehová Diospa testigonkunan ruwan.
[9 paginapi willakuy]
Jesusqa willaranmi wakillanta paypas angelkunapas yachasqankuta, Papallan tukuy imaymana yachaq kasqantawan