Kay revista leeqkunaq tapukuynin

¿Kanpunichu Saqra?

Arí, kanpunin. Biblian yachachin Saqra Satanasqa huk millay mana allin ruwaq kasqanta. Chaywanpas wakin Biblia t’aqwiqkunaqa manan chayta creenkuchu, paykunaqa ninkun: “Satanasqa yanqa cuentollan”, nispa.

Imaynan huk huchapakuq runa mana reparachikuspalla imatapas ruwan, chhaynallataqmi Saqrapas pakallamanta imaymana mana allinkunata ruwan. Payqa manan munanchu runakuna paymanta cheqaq kaqta yachanankuta, chayraykun askha runakuna “cuentollan Saqraqa”, nispa ninku. Chaywanpas Señor Jesusqa sut’itan willarqan pichus Saqra kasqanta, hinallataq paypa causanpi kay pachapi mana allinkuna kasqantawan, chaymi Saqramanta nirqan: ‘Paymi kay pachapi kamachikuq qollana’, nispa (Juan 12:31).

¿Imaynapitaq Saqrari paqarimurqan? Qallariypiqa allin angelmi karqan. Pisi-pisimantan ichaqa millayman tukupurqan, chaymi mana munarqanchu runakuna Diosta servinankuta, aswanmi payta servinankuta munarqan. Hinan payqa Dios contra hatarirqan, chhaynapitaq Saqraman tukupurqan. Millay kasqanqa sut’itan reparakun Jesuswan rimasqanpi. Chay kutipin Jesusta nirqan: ‘Qonqoriykukuspa yupaychaway’, nispa (Mateo 4:8, 9).

Saqraqa payllapaqmi imatapas munan, payqa imatapas ruwanmanmi runakunata Diosmanta t’aqananpaq, chaytan sut’ita reparanchis Dioswan rimasqanpi, chaymantan Job libro willashan (Job 1:13-19; 2:7, 8).

Chhaynaqa, ¿ima nisunmanmi? ¿Yanqa cuentollachu kanman Satanás? Manapunin. Cuentolla kanman chayqa, ¿piwantaq Diospas Jesuspas rimarqanri? ¿Ch’usaqllamanchu rimapayankuman karqan? Manan riki. Chhaynaqa kanpunin Satanasqa. Payqa huk millay angelmi, manataqmi Jehová Diostapas Jesustapas manchakunchu.

Kay pachapi mana allin kawsay kasqanpin reparallanchistaq Saqraq kasqantaqa. Wakin llaqtakunapiqa ismushanraqmi mikhunaqa, waranqanpi runakunataq ichaqa yarqaymanta wañushanku. Chaymantapas llaqtakunaqa imaymana armakunatan ruwanku runamasinku wañuchinankupaq; hinallataq wayratapas unutapas sinchitapuni qhellichashanku. Kikinkuq mana allinninpaqña chaykuna chaypas, runakunaqa manan yachankuchu imarayku chaykuna ruwasqankuta. ¿Imaraykun mana yachankuchu?

Saqrayá ‘paykunaq yuyayninta tutayachin’ (2 Corintios 4:4). Payqa ‘supaykunata kamachiqmi’, paykunawantaqmi mana reparachikuspalla runakunata pantachishan (Mateo 12:24). Chayta allinta entiendenapaq huk millay umalli runawan rikch’anachisun. Paypan kanman askha mana allin ruwaqmasinkuna, hinaspa paykunata kamachinman waranqanpi runakunata contratananpaq, chhaynapi paypaq llank’anankupaq. Chay contratasqakuna manaña chay millay umallita reqsinkuchu chaypas, paypaqmi llank’anku. Chay umalli runa hinan Satanaspas millay angelninkunawan runakunata pantachishan chhaynapi munayninta ruwanankupaq.

Biblian ichaqa sut’ita willawanchis Saqramanta, hinallataq paypa yanapaqninkunamantapas, chhaynapin makilla kasunchis paykunamanta cuidakunanchispaq. Biblian niwanchis: “Diostapuni kasuychis, saqraq contranpitaq qaqata sayaychis, chaymi payqa qayllaykichismanta ayqekapunqa”, nispa (Santiago 4:7).