¿Kanpunichu Saqra?
¿Ima ninmi Biblia?
Arí, Saqraqa kanmi, payqa juj espiritun payllamantan millayman tukupurqan jinaspa Dios contra jatarirqan. Paymi “kay pacha kamachikuqqa” (Juan 14:30; Efesios 6:11, 12). Biblian willan imayna Saqra kasqanta, ima sutikunawan churasqa kasqantapas. Chaykunamanta yachasunchis:
Satanás sutiqa “contrapi churakuq” ninanmi (Job 1:6).
Saqra nisqa sutiqa, “yanqamanta tumpaq” ninanmi (Apocalipsis 12:9).
Mach’aqwaytan Bibliapiqa nikullantaq engañakuq nispa (2 Corintios 11:3).
Tentaq (Mateo 4:3).
Llullakuq (Juan 8:44).
Saqraqa manan cuentopi jina rimayllachu, nitaqmi ukhunchispi mana allin kaqpaschu
Wakin runakunan piensanku: “Saqraqa runakunaq sonqonpi otaq Diospa sonqonpi mana allin kaqmi”, nispa. Biblian willashan juj kutin Dioswan Saqrawan rimasqankumanta. Diosqa tukuypin ch’uya, chanin ima, chhaynaqa Diospiqa manapunin mana allinqa kanmanchu (Deuteronomio 32:4; Job 2:1-6). Bibliaqa willallantaqmi Jesusta Saqra tentasqanmanta, Jesuspas ch’uya mana juchayoqmi (Mateo 4:8-10; 1 Juan 3:5). Bibliaqa sut’itan willashan Saqraqa mana cuentopi jina rimayllachu, aswanpas mana allinkunata ruwaq millay espiritun.
Askha runakunan ninku: “Saqraqa manan kanchu”, nispa. Chayta nisqankuqa manan admirakunapaqchu. Bibliapin willashan Saqraqa imaymanata ruwaspa runakuna engañasqanta (2 Tesalonicenses 2:9, 10). Saqraqa manan munanchu paymanta runakuna yachanankuta chaymi paykunata engañan otaq yuyayninkuta tutayachin (2 Corintios 4:4).
Saqramanta pantasqa yachachikuykuna
Pantasqa yachachikuy: Lucifer nispan Saqrata sutichallankutaq.
Cheqaq yachachikuy: Wakin Bibliakunapin hebreo simipi “Lucifer” nispa churamurqanku “¡Pacha paqar ch’aska!”, nispa (Isaías 14:12, Diospa simin qelqa). Hinaspapas juj profeciata willamusqankupin churamurqanku chay simita, ¿pimantan chaypi willasharqanku? Ñaupa tiempopi Babilonia llaqtapi kamachikuqkunamantan, paykunatan Jehová Dios k’umuchinan karqan sinchi jatunchakuq kasqankurayku (Isaías 14:4, 13-20). Chay profecian willashan Babiloniapi kamachikuqkuna chinkachisqa kaqtinku “Pacha paqar ch’aska” jina urmaykachisqa kasqankumanta.
Pantasqa yachachikuy: Saqraqa Diospaqmi llank’an.
Cheqaq yachachikuy: Saqraqa Diospa enemigonmi, payqa manan Diostaqa servinchu. Chaymantapas Saqraqa Diosta serviqkunaq enemigonmi chaymi paykunata qatiykachan, yanqamanta ima tumpan (1 Pedro 5:8; Apocalipsis 12:10).