6: “Allinmi imagenkunawan Diosta serviyqa”, nispan ninku

¿Maymantan paqarimurqan chay yachachikuy?

“Ñawpaq cristianokunaqa manan imagenkunawanchu Diostaqa yupaychaqku [...]. 300 otaq 500 wata ukhupin Iglesia Catolicaqa imagenkuna ruwachiyta qallarirqan, chaykunawansi mana estudiaq runakunaqa aswan facil-llata yachankuman cristiano kayta, manataq librokunawanchu nitaq yachachikuqkunata uyarispachu.” (Cyclopedia of Biblical, Theological, and Ecclesiastical Literature, de McClintock y Strong.)

¿Imanintaq Bibliari?

“Aman ima idolotapas, ima rikch’aytapas ruwakunkichu, hanaq pachapi kaqman rikch’akuqtapas, kay pachapi kaqman rikch’akuqtapas, kay pachaq ukhun unupi kaqman rikch’akuqtapas. Aman chaykunaman k’umuykukunkichu, amallataq chaykunata yupaychankipaschu”, nispa (Éxodo 20:4, 5). Apóstol Juanpas nirqanmi: “Wawallaykuna, idolokunataqa amapuni yupaychaychischu”, nispa (1 Juan 5:21).

Askha religionkunan ninku: “Pitachus imagenkuna representan paykunata respetasqaykuta munakusqaykuta rikuchinallaykupaqmi chay imagenkunataqa hap’iyku”, nispa. ¿Cheqaqchu kanman chay nisqanku? Manan. Huk libron khaynata nin: “Qallariypiqa imagenkunata ruwaqku runakunata yachachinallapaqsi, otaq adornota hinalla hap’inapaq, chhaynatan niqku chay imagenkunata ruwachiqkuna. Ichaqa ratullan chaykunata yupaychayta qallarirqanku. Astawanqa chayta ruwarqanku Ortodoxa Oriental nisqa Iglesiakunan”, nispa (The Encyclopedia of Religion). Profeta Isaiasmi nirqan: “Chay hinaqa, ¿imawantaq Diosta rikch’anachinkichis? ¿Imaman rikch’akuqtan payta ruwankichis?” nispa (Isaías 40:18).

Kay textokunata leey: Isaías 44:13-19; Hechos 10:25, 26; 17:29; 2 Corintios 5:7.