Kay revistata leeqkunaq tapukusqan

Huñunakuykunapi, hatun huñunakuykunapipas discursota makiwan rimayman t’ikraq hermanakunaqa, ¿qatakunanchu umankuta?

Llapa cristiana warmikunaqa umankutan qatakunanku qosankuq otaq hermanokunaq ruwananta ruwashaspa. Chaypaq kamachikuyqa Diospa Simin Qelqapin tarikun, apóstol Pablon kay hinata nirqan: “Pi warmipas uman mana qatasqa mañakun otaq profetizan chayqa, qosantan pisichan”, nispa. ¿Imaraykun chayta ruwaq warmi qosanta pisichanman? ‘Qhari esposanpa uman’ kasqanrayku (1 Cor. 11:3-10). Chhaynakunapi tarikuspa mana k’achanchakuspalla umanta qatakuq cristianaqa Jehová Dios llaqtanpi kamachikuykuna churasqantan kasukushan (1 Tim. 2:11, 12).a

¿Imanisunmantaq huk hermanoq discurso qosqanta t’ikraq hermanamantari? Hermanaqa discurso qoqpa rimasqallantan huk rimayman t’ikrashan, chhaynaqa manan paychu yachachishan. Uyariqkunapaq t’ikraq hermanaqa manan lliwpa qhawarisqanchu kapun, paytaña uyarishanku chaypas, discurso qoqtan makilla qhawashanku. Chay hermanakunaqa mayninpi discurso qoqta qhawaspallan otaq tiyasqallankumanta t’ikranku discursota. Chhaynaqa manan umankuta qatakunankuchu. ¿Makiwan t’ikraq hermanakunari qatakunankuchu umankuta?

Allinmi kanman umankuta qatakunkuman chayqa. Paykunataqa hatun televisionpin rikunku, discurso qoqtataq manaña qhawarinkupaschu, chayraykun allin kanman makiwan rimaqkunapaq t’ikraq hermanakunaqa umankuta qatakunanku. Chaywanmi rikuchinqaku mana paykunachu yachachisqankuta.

Bibliamanta Allin Yachachiq Kanapaq Escuelapi, demostracionkuna ruwakuqtin, Biblia Estudianapaq Huñunakuypi tapuykunata kutichikuqtin, Predicayta Yachanapaq huñunakuypi, Qhawaq revista estudiopi, makiwan rimayman t’ikraq hermanakuna, ¿umankuta qatakunankuchu? Mayninpiqa manan, llapa uyariqkunaqa rikushankun mana t’ikraqchu huñunakuyta umallisqanta. Chayqa kanman hermanakunaq tapuykuna kutichisqanta otaq demostracionkunata t’ikraqtin. Ichaqa umankutan qatakunanku huñunakuypi hermanoq discursonta t’ikranankupaq, hinallataq Qhawaq revistata estudiakusqanta, Biblia Estudianapaq Huñunakuypi estudiakusqanta, huñunakuypi takikusqanta t’ikranankupaqpas. Yaqapaschá chay huñunakuypi hermanokunata, hermanakunata, wawakunata, umalliqkunatapas yanapanqa t’ikraypi. Chhayna kaqtinqa umanku qatasqalla kankuman huñunakuy tukunankama.

[Uranpi willakuy]