Sumaq tiempon chayamushanña
JESUSPA qatikuqninkunaqa profeta Habacuc hinan munarqanku millay kawsay tukukunanta. Diospa Gobiernon imakuna ruwananmanta Jesús yachachishaqtinmi paykuna tapurqanku: “Niwayku, ¿hayk’aqtaq chaykunaqa kanqa? Kutimunaykiña kashaqtinqa [cielopi Reyña kashaqtiykiqa] kay tiempopas p’uchukapunanpaqña kashaqtinqa, ¿imakunatan rikusaqku?” nispa (Mateo 24:3). Hinan Jesusqa paykunata nirqan: ‘Diosllan yachan hayk’aqchus kay pachata kamachimunqa chayta’, nispa (Mateo 24:36; Marcos 13:32). Chhaynaña kaqtinpas, Jesuspas wakin Biblia qelqaqkunapas willarqankuñan chay tiempo chayamunanña kashaqtin imakuna sucedenanmanta. Qhawarisunchis paña ladopi kaq recuadrota.
Chaypi rikusqanchis hina, kay tiempopiqa chhaynan kawsay kashan. Chaymantapas Jesusqa willallarqantaq: “Qhapaqsuyumanta [Diospa Gobiernonmanta] allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p’uchukayqa chayamunqa”, nispa (Mateo 24:14).
Chay allin willakuykunatan Jehová Diospa testigonkuna willashanku 236 nacionkunapi. Testigokunaqa qanchis millón masñan kanku, llapan runakunatataq visitanku Diospa Gobiernonmanta, Bibliaq yachachikuyninkunatawan yachachinankupaq. Sichus qanpas yachashallanki Diospa Gobiernonmanta chayqa, wiñay kawsaytan aypawaq.
[31 paginapi recuadro]
¿Imakunatan ‘rikunanchis’ karqan?
MATEO 24:6, 7; APOCALIPSIS 6:4
• Hatun guerrakunata.
• Terremotokunata.
• Yarqaykunata.
• Mast’arikuq onqoykunata.
• Millay runakunaq mirasqanta.
• Mana munakuyniyoqkunata.
• Kay pacha qhellichasqankuta.
• Qolqe sonqokunata.
• Tayta-mamanku mana kasuqkunata.
• Paykuna kikinku munakuqkunata.
• Familian mana munakuqkunata.
• Mana allipunakuqkunata.
• Munaynillanta ruwaqkunata.
• Allin kaq cheqnikuqkunata.
• Dios munakunankutaqa aycha kusichiyllapi puriqkunata.
• Dios sonqo runaman rikch’akuqkunata.
• Llulla profetakunata.
• Cheqaq cristiano cheqnikuqkunata.
• Bibliaq nisqanta mana kasukuqkunata.
[31 paginapi foto]
Jehová Diospa testigonkunaqa pachantinpin predicashanku Diospa Gobiernonmanta