Diosta allinta reqsiy
Allinlla kananchistan Dios munan
MUNAKUQ taytaqa wawankuna kusisqa kawsanankutan munan. Chhaynallataqmi Jehová Diospas munakuywan cuidawanchis, yachachiwanchistaq kusisqa kawsananchispaq. Chaymi Bibliapi yachachiwanchis chhayna kanapaq imakunatan ruwananchis chayta. Wakinmanta yachasunchis Josué 1:6-9 textopi.
Kay paginapi kaq dibujota qhawariy. Chaypi kashan Moisés, chimpanpitaq Israel llaqta. Wañusqan qhepamanmi Josué Israel runakunata pusanan karqan Prometesqa Hallp’aman. Llaqta alistakushanankama Jehová Diosqa Josueta askha kamachikuykunata qorqan. Sichus pay kasukunman chayqa, tukuy imapas allinmi kanan karqan. Kaqllataqmi ñoqanchispipas kanman (Romanos 15:4).
Israel runakunata Prometesqa Hallp’aman pusayqa sasan kanan karqan, chaymi Jehová Dios kinsa kutita Josueta kallpacharqan allin qhari kananpaq allinta sayananpaqwan (Josué 1:6, 7, 9). ¿Imatan ruwanan karqan chhayna kananpaq?
Jehová Diosmi nirqan: “Moisespa qosqasuyki kamachikuykunata llapantapuni hunt’ay”, nispa (Josué 1:7). Chaypi nisqan hina Josueqa Diospa qelqankunawanmi kallpachakunan karqan mana manchakuq kananpaqa. Chay qelqakunataqa manan hap’inallanchu karqan. ¿Imatawanmi ruwanan karqan?
Diospa Simin Qelqakunatan sonqonpi hap’inan karqan. Chaypaqmi Jehová Dios nirqan: “Chaytaqa tuta-p’unchaymi yuyaymanallankipuni”, nispa (Josué 1:8). ¿Ima ninantan chaywan nisharqan? Chaymantan huk libro nin: “Chaywanmi Diosqa Josueta nisharqan ‘ninriman rimaq hinalla’ kamachikuyninkunata leenanpaq”, nispa. Chhaynaqa sapa p’unchaymi Diospa Simin Qelqakunata leenan yuyaymananan karqan, chhaynapin ima sasachakuykunatapas atipanan karqan.
Chaymantapas Josueqa yachasqanman hinan kawsanan karqan. Jehová Diosmi nirqan: “Qelqaq kamachikusqanman hinapuni [ruway]. Chay hinapin tukuy ima ruwasqaykipas allinkama kasunki”, nispa (Josué 1:8). Diospa kamachikuyninta kasukuyqa ancha allinpunin (Isaías 55:10, 11). Chayraykun Josueqa Diosta kasukunan karqan chhaynapi tukuy imapas allinlla kapunanpaq.
¿Kasukurqanchu Josué Jehová Diospa nisqanta? Arí, chayraykun kusisqa kawsarqan (Josué 23:14; 24:15).
Jehová Diosqa allinlla kanaykita kusisqa kawsanaykitan munan. Chaypaqmi sapa p’unchay Bibliata leenayki, chayman hinataq kawsanayki. Unay tiempo Diosta serviq cristianoq nisqan hina, Bibliaq nisqantaqa sonqoyki ukhupin hap’inayki. Chayta ruwanki chayqa, Josué hinan kanki. Hinan “tukuy ima ruwasqaykipas allinkama kasunki”.
[Uranpi willakuy]
a Chay tiempopaqqa Moisespa qelqasqan librokunallan karqan, chaykunan karqan: Génesis, Éxodo, Levítico, Números, Deuteronomio, Job, huk otaq iskay salmo qelqakunapiwan.