¿Imakunataq pasanqa Taripay P’unchaypiri?

1. ¿Imataq Taripay P’unchayri?

Paña ladopi rikusqanchis dibujopi hinan askha runakuna yuyaykunku Taripay otaq Juicio P’unchay chhayna kananmanta. Millonninpi runakunas Diospa trononpa ñawpaqenpi kashanku imachus ruwasqankumanta juzgasqa kanankupaq. Chaypis huchachasqa kanqaku wakin hanaq pachaman rinankupaq wakintaq infiernoman rinankupaq. Biblian ichaqa mana chhaynatachu yachachin, aswanpas Diospa Taripay P’unchayninqa kay pachapi mana chanin ruwaykunata tukuchinanpaqmi (Salmo 96:13). Diosmi Jesusta Juezta hina churarqan llapa runakunapaq chanin kawsayta apamunanpaq. (Leey Isaías 11:1-5; Hechos 17:31.)

2. ¿Imaynatan Taripay P’unchaypi juzgakunqa?

Adanmi Jehová Diospa contranpi huchallikurqan. Chaymi paypa huchanpi llapa mirayninkuna huchayoq kanchis, ñak’arinchis wañunchispas (Romanos 5:12). Chayta allichananpaqmi Jesusqa millonninpi runakunata kawsarichinqa. Apocalipsis qelqapi nisqan hina chayqa kanqa Jesús waranqa watata kamachikuqtin. (Leey Apocalipsis 20:4, 11, 12.)

Kawsarimpuqkunaqa juzgasqan kanqaku, ichaqa manan ñawpaqpi imachus ruwasqankuman hinachu, aswanpas Apocalipsis qelqapi 20 capitulopi nisqanman hina qelqa k’uyu willakusqanman hina kanqa (Romanos 6:7). Apóstol Pablo willarqan ‘chaninkunapas mana chaninkunapas’ kawsarimpunanmanta, paykunaqa Diosmanta yachanankupaqmi kawsarimpunqaku. (Leey Hechos 24:15.)

3. ¿Iman kallanqataq Taripay P’unchaypi?

Jehová Diosta mana reqsispa wañukapuqkunaqa kawsarimpuspan atinqaku Diospa munaynin ruwayta. Chayta ruwaqtinkuqa ‘kawsanankupaqmi kawsarimpunqaku’. Wakinkunan ichaqa mana Diosta kasukuyta munanqakuchu, chhayna kaqtinqa ‘Diospa huchachasqan kanankupaqmi kawsarimpunqaku’. (Leey Juan 5:28, 29; Isaías 26:10; 65:20.)

Taripay P’unchayqa waranqa watan kanqa, chay qhepamanmi Jehová Dios ñawpaqpi yuyaykusqanman hina llapa runakunata ch’uyaman tukuchinqa (1 Corintios 15:24-28). ¡Chay ruwasqanqa may allinmi kanqa kasukuq runakunapaq! Saqra waranqa wata wisq’asqa kasqan qhepamanmi pisi tiempollapaq kacharichisqa kanqa runakunata wateqayman churananpaq. Satanasqa tukuy atisqantan ruwanqa runakunata Diosmanta t’aqananpaq, iñiyninkupi qaqata sayaqkunaqa wiñaypaqmi kay pachapi kawsanqaku. (Leey Isaías 25:8; Apocalipsis 20:1, 7-9.)

4. ¿Kanchu huk Taripay P’unchay runakunapaq bendicionkunata apamuq?

Arí, Biblia nisqan hina kanmi huk Taripay P’unchay. Chayqa kay pachapi millay kawsaytan tukuchinqa. Hinaspapas qonqayllan hamunqa imaynan Noepa tiemponpi Millp’uq Para Unu millay runakunata ch’usaqyachirqan hinata. Pisi tiempomantaqa ‘Diosta mana manchakuq runakunan’ ch’usaqyachisqa kanqaku, chhaynapin Diosta yupaychaqkunalla kay pachapi kawsanqaku, chaypiqa “tukuy imapas chaninkaman kanqa”. (Leey 2 Pedro 3:6, 7, 13.)