BIBLIAMANTA TAPUKUYKUNA
¿Imataq Diospa juicionri?
¿Imaraykun juicio p’unchay kusikunapaq?
Jehová Diosmi ñawpa tiempopi qollanakunata otaq juezkunata churarqan llaqtanta millay runakunamanta hark’ananpaq (Jueces 2:18). Biblian riman juicio p’unchaymanta. Chay p’unchayqa kusikunapaqmi kanqa, chay tiempopin Jehová Diosqa chanin kawsayta apamunqa (leey Salmo 96:12, 13; Isaías 26:9).
Chaytaqa Jesuswanmi ruwachinqa, paytan juezta churarqan kawsaqkunata wañusqakunatapas juzgananpaq (Hechos 10:42; 17:31). Askha runakunan wañukapurqanku Diosta mana reqsispa, paykunatan Jesús juicio p’unchaypi kawsarichimunqa, chhaynapin llapa munaqkuna Diosta reqsinqaku munakunqaku ima (leey Hechos 24:15).
¿Hayk’a tiempotaq kanqa juicio p’unchayri?
Bibliaq nisqan hina chay juicioqa waranqa watan kanqa. Chay tiempopin wañupuqkuna kawsarimunqaku hinaspa llapa munaqkuna Diosta reqsinqaku kasukuytapas yachanqaku (Apocalipsis 20:4, 12). Wakin runakunan ninku: “Ñawpaqpi huchallikusqankumantan juzgasqa kanqaku”, nispa. Biblian ichaqa willan kawsarimpusqanku qhepaman imachus ruwasqankuman hina juzgasqa kanankuta (leey Romanos 6:7).
Manaraq waranqa wata qallarishaqtinmi huk juicio p’unchay kanqa. Chay p’unchaytan nikun “tukukuy p’unchay” nispa, chaymantan willashan kay revistaq qallariyninpi. Chay juicio p’unchaypin Diosqa llapa millay runakunata wañuchinqa (2 Pedro 3:7). Chayraykun tukuy sonqomanta Dios munakuyta yachananchis (leey 2 Pedro 3:9, 13).