LEEQKUNAQ TAPUKUSQAN

Juan 11:35 textopi nisqan hina, ¿imaraykun Jesús waqarqan Lazarota wañusqanmanta kawsarichimpunanña kashaqtinpas?

Llapallanchismi waqanchis munakusqanchis runa wañupuqtinqa. Jesuspas munakurqanmi Lazarota, ichaqa manan pay wañupusqanraykuchu waqarqan, aswanpas Lazaroq familianta amigonkunatapas waqashaqta rikuspan paykunata khuyapayaspa waqarqan, Juan 11:36 textoq ñawpaq versiculokunapi nisqan hina.

Jesusqa uyarirqanmi Lazaroq onqosqanmanta, ichaqa manan kaqratochu rirqan qhaliyachinanpaq. Biblian nin: ‘Chaywanpas onqosqa kashasqanta uyarispanmi iskay p’unchaytawanraq kasqanpi qhepakurqan’, nispa (Juan 11:6). ¿Imaraykun Jesús mana onqosqa kasqanta yacharuspa hinachu rirqan? Chaymantan Jesús nirqan: “Chay onqoyqa manan wañuchinanpaqchu, aswanpas Diosta hatunchanapaqmi, chay onqoywanqa Diospa Churinmi hatunchasqa kanqa”, nispa (Juan 11:4). Arí, Jesusqa Lazaroq wañusqanwanmi ‘Diosta hatunchanan’ karqan. ¿Imaynatan chayta ruwarqan? Jesusqa ancha admirakunapaq milagrota ruwaspan munakusqan amigonta aya p’ampanamanta hatarichinpunan karqan.

Lazaromanta qatikuqninkunawan rimaspan Jesusqa wañuyta puñuywan rikch’anachirqan. Chaymi paykunata nirqan: “Payta rikch’arichimuqmi risaq”, nispa (Juan 11:11). Imaynan huk tayta wawanta rikch’arichin puñusqanmanta, chay hinallan Jesuspaqqa karqan Lazarota wañusqanmanta kawsarichiyqa. Chaymi payqa mana llakikurqanchu Lazaroq wañupusqanmanta.

Chhaynaqa, ¿imaraykutaq Jesús waqarqan? Chaypaq qhawarisun Juan 11:33, 35 textokunapi nisqanta. Lazaroq panan Mariata huk runakunatawan waqaqta rikuspan Jesuspa “sonqon ‘ch’allaq’ nirqan, hinaspan sinchita llakikurqan”. Arí, sonqonmi “ch’allaq” nirqan paykunata sinchi llakisqata rikuspa, chaymi paykunata khuyapayaspa ‘Jesusqa waqarqan’.

¿Imakunatan chay willakuymanta yachanchis? Chay kutipi hinan Jesusqa atiy chaskisqanwan wañupuqninchiskunata mosoq pachapi kawsarichinqa, onqosqakunatataq qhaliyachinqa. Hinaspapas Jesusqa khuyapayanmi wañuqpa familianta. Chay hinatan ñoqanchispas llakipi tarikuqkunata khuyapayananchis.

Jesusqa yacharqanmi Lazarota kawsarichinanta, chaywanpas amigonkunata khuyapayaspan waqarqan. Chhaynatapaschá ñoqanchispas hukkunata khuyapayaspa ‘waqaqkunawan waqasun’ (Rom. 12:15). Wañupuq runamanta waqaqqa manan pisi iñiyniyoq kasqanraykuchu waqan. Jesuspas Lazarota kawsarichinanña kashaqtinpas waqarqanmi. Chaymi yachachiwanchis llakipi tarikuqkunata khuyapayanapaq.