¿Pitaq Diostari kamarqan?

Huk taytan 7 watayoq wawanta nin: “Ñawpaqpin Diosqa hallp’ata, intita, killata, ch’askakunatapas kamarqan”, nispa. Wawantaq huk rato piensaykuspa taytanta tapun: “Papay, ¿pitaq Diostari kamarqan?”, nispa.

Taytantaq nin: “Manan pipas, Diosqa karqanpuniñan”, nispa. Wawanqa kusisqan uyarikun. Ichaqa wiñasqanman hinan wawaqa astawanraq yachayta munan. Payqa tapukunmi: “¿Imaynapitaq Diosri mana qallariyniyoq? Tukuypas qallariyniyoqmá riki”, nispa. Chaymi tapukushallan: “¿Maymantan Dios hamurqan?”, nispa.

¿Imanintaq Bibliari? Chay taytaq nisqanta hinan willan. Moisesmi Jehová Diosta nirqan: “Manaraq orqokunapas rikhurimushaqtin, manaraq teqsimuyuntinpas kashaqtin, qanmi wiñaymanta wiñaykama Diosqa kanki”, nispa (Salmo 90:1, 2). Profeta Isaiaspas nirqanmi: “¿Manachu yacharqanki? ¿Manachu uyarirqanki? Señor Diosqa wiñay Diosmi, teqsimuyuntinta kamaqmi”, nispa (Isaías 40:28). Jesuspa qatikuqnin Judaspas nirqanmi Diosqa ‘wiñay-wiñaypaq’ kawsasqanta (Judas 25).

Chay textokunan sut’ita rikuchin Diosqa ‘wiñay-wiñaymanta Rey’ kasqanta, chaytan apóstol Pablopas nirqan (1 Timoteo 1:17). Arí, Diosqa karqanpuniñan kashallanqapunitaqmi (Apocalipsis 1:8). Manan kanchu qallariynin manataqmi kanchu tukukuyninpas, chaymi rikuchin hukkunamanta hukniray kasqanta.

¿Imaraykun sasata entiendenchis? Pisi tiempolla kawsasqanchisraykun, runakunaqa manan Jehová Dios hinachu tiempota rikunchis. Diospaqqa waranqa watapas huk p’unchay hinallan, ¿imarayku? Wiñay kawsayniyoq kasqanrayku (2 Pedro 3:8). Astawan entiendenapaq rimasun ch’illikumanta otaq t’isku-t’iskumanta. Chay animalqa 50 p’unchayllatan kawsan. Chay animal, ¿entiendenmanchu runaq 70 otaq 80 watakuna kawsasqanta? Manan riki. Ñoqanchispas chay ch’illiku hinan kanchis kamaqninchiswan tupanachikuqtinchisqa. Yuyayninchispas manan imapaschu Diospa yuyayninwanqa (Isaías 40:22; 55:8, 9). Chaymi Diosninchis imaynapunichus kasqantaqa sasata entiendenchis.

Hinaspapas wiñay kawsayniyoq Dios kasqanqa tupanmi kamaq kasqanwan. Sichus pipas Diosta kamanman karqan chayqa, paytachá kamaq nikunman. Biblian ichaqa willan Jehová Dios tukuyta kamasqanta (Apocalipsis 4:11). Ñoqanchisqa yachanchismi tukuy imapas qallariypiqa mana kasqanta (Génesis 1:1, 2). Sichus Dios mana wiñay kawsayniyoqchu kanman chayqa, ¿pitaq tukuy imatapas ruwanman karqan? Arí, Diosqa kawsarqanpuniñan phiwi wawanpas angelkunapas manaraq kashaqtin (Job 38:4, 7; Colosenses 1:15). Manaraq imatapas Dios kamashaqtinqa sapallanmi kawsarqan. Chaymi paytaqa mana pipas kamarqanchu.

Kawsayninchispas tukuy ima ruwasqakunapas sut’itan rikuchin Diosqa wiñay kawsayniyoq kasqanta. Payqa wiñaypaqmi kawsan, chaymi tukuy imaymana kamasqankunaqa ordenpi kashan, imachus ruwanankutapas ruwashanku. Payllan llapa kawsaqkunamanpas kawsayta qorqan (Job 33:4).