¿Kutichinchu Biblia tapukusqanchista?

Yaqapaschá qanpas chayta tapukurqanki. Hukkunapas tapukullarqankutaqmi, munankutaq chaykunamanta yachayta. ¿Tarisunmanchu chay tapuykunaq kutichiyninta?

Millonninpi runakunan ninkuman “arí” nispa. Paykunaqa Bibliapin chay tapuykunaq kutichiyninta tarirqanku. ¿Munawaqchu qanpas yachayta imatapuni Bibliaq yachachisqanta? Jehováa Diospa testigonkunan Bibliamanta gratislla yachachinku.

Askha runakunan mana munankuchu Biblia estudiayta. Wakinmi ninku Biblia estudiayqa tiempopaq kasqanta, sasa kasqanta. Wakinmi ichaqa kallpachakurqanku estudianankupaq. ¿Imaninkun paykuna? Chayta qhawarisun.

• Inglaterra nacionmanta Gill runa nin: “Rirqanin católica, sij, budismo, huk religionkunamanpas; universidadpipas teología nisqatan estudiarqani. Ichaqa mana tarirqanichu tapukusqaykunaq kutichiyninta. Hinan huk Testigo visitamuwarqan. Tapukusqaytataq Bibliawan kutichiwarqan, chaymi Biblia estudiayta qallarirqani”, nispa.

• Benín nacionmanta Koffi runa nin: “Kawsaymanta imaymana tapukuyniykunan karqan, chaymi pastorniyta tapurqani, ichaqa manan sut’itachu kutichiwarqan. Huk Testigon ichaqa Bibliawan kutichiwarqan, chayraqmi entienderqani. Estudiayta munawaqchu niwaqtintaq ‘arí’ nirqani”, nispa.

• Brasil nacionmanta José runa nin: “Wañupuqkunatan sinchita manchakuq kani, chaymi wañupuqkunamanta yachayta munarqani. Nirqanitaq: ‘Yaqapaschá Bibliapiqa chayta yachayman’, nispa. Hina huk Testigowan estudiayta qallarirqani”, nispa.

• México nacionmanta Dennize runa nin: “Biblia leeytan qallarirqani, ichaqa manan entienderqanichu. Huk p’unchaymi Testigokuna wasiyman hamuspa askha textokunata explicawarqanku. Hinan astawan munarqani Biblia estudiayta”, nispa.

• Nepal nacionmanta Anju runa nin: “‘¿Munakuwanmanchu Dios?’ nispan tapukurqani. Chaymi Bibliapi rimaq Diosmanta mañakurqani. Huk p’unchay qhepamantaq Testigokuna visitamuwarqanku, hinan Biblia estudiayta qallarirqani”, nispa.

Chay runakunaq nisqankuqa cheqaqmi. Jesusmi nirqan: “Kusisamiyoqmi huch’uyyaykukuspa Diosta maskhaqkunaqa”, nispa (Mateo 5:3). Llapanchismi kusisqa kawsayta munanchis. Ichaqa, ¿pin yanapawasunman? Jehová Diosllan. ¿Imaynata? Bibliawan.

¿Imaynatan entiendewaq Bibliaq yachachisqanta? ¿Imaynatan chay yachasqayki yanapasunkiman? Chaykunamanta qatiqninpi yachasun.