¿Ima qolqewanmi gastokunata pagayku?

Sapa watanmi Bibliata huk qelqakunatawan ruwaspa millonninpi rakiyku. Askha nacionkunapin kan sucursalniyku, qelqakunata ruwanapaq hatun imprentakunapas. Pachantinpin t’aqa-t’aqapi huñukuyku “huñunakuna wasi” nisqakunapi. ¿Ima qolqewanmi chaykunata ruwayku?

Chaytaqa ruwayku donacionkuna churasqaykuwanmi (2 Corintios 9:7). 1879 wata agosto killa Sionmanta Qhawaqpa Torren (inglés simipi) revistan nin: ‘[Kay revistaqa] JEHOVÁ Diospa yanapayninwanmi ruwakun, chayraykun mana hayk’aqpas runakunamanta qolqeta mañapakusunchu nitaq valepakusunchu’, nispa. Chay hinan kunankamapas kashan.

Donaciontaqa sucursalmanmi apachikun otaq huñunakunayku wasipi cajakunaman churakun. Manan pimantapas diezmota mañaykuchu, nitaq qelqakunata vendeykuchu. Manan pipas pagawankuchu predicasqaykumanta yachachisqaykumanta, huñunakuna wasikunata hatarichisqaykumantapas. Jesuspunin nirqan: “Gratisllan chaskirqankichis, gratisllataqmi qonkichispas”, nispa (Mateo 10:8). Oficina centralpi, sucursalkunapi llank’aqkunapas manan qolqepaqchu llank’anku. Jehová Diospa testigonkunata umalliq t’aqapas otaq junta directiva nisqapas manan sueldoyoqchu kanku.

Jesuspa tiemponpi cristianokunaqa sasachakuypi tarikuq iñiqmasinkumanmi yanapayta apachiqku (Romanos 15:26). Kunanpas donacionkuna churakusqanwanmi llakipi tarikuqkunata yanapayku. Terremoto otaq ima llakipas pasasqan llaqtakunapin yanapayku wasikunata hukmanta sayarichispa, mikhuyta, p’achata, hampikunata apaspa, huñunakusqayku wasikunata allichaspa ima.