Bibliata entiendenapaq yanapay

Kaypi piensay, sichus primera vez juj nacionta riwaq chayqa yaqapaschá juj jina sientekuwaq. Chaypiqa runakunapas, qolqepas, mikhunapas, costumbrekunapas jujniray kasqanrayku.

Yaqapaschá chhaynallataq sientekunki primera vez Bibliata leespayki. Bibliaqa antiguo kausaymantan riman. Chaypin yachanki Filistea llaqtamanta, juj llaqtakunamantapas, yachankin juj costumbrekunamanta; ejemplopaq, ¿imaraykun p’achankuta llik’ikuranku? Yachallankitaqmi maná alimentomanta, chay tiempopi qolqemantapas (Éxodo 16:31; Josué 13:2; 2 Samuel 3:31; Lucas 15:9). Yaqapaschá chaykunataqa mana jayk’aqpas yacharankichu. Juj nacionpi tarikuqtiyki pipas yanapasuqtiykiqa anchatachá agradecekuwaq. ¿Manachu chhayna yanapanata munawaq Bibliata entiendenaykipaq?

ÑAUPA TIEMPOPI YANAPAYKUNA

1513 watapi Bibliata qelqakuyta qallarikusqanmantapachan karanpuni entiendechiq runakuna. Ejemplopaq, Moisesqa Israel llaqtapi umalliqmi karan, payqa Diospa Simin Qelqakunatan jujkunaman entiendechiran (Deuteronomio 1:5).

Waranqa wata qhepakunamanpas kasharanraqmi Diospa Simin Qelqamanta yachachiqkunaqa. 455 watapin, manaraq Jesús jamushaqtin, Jerusalén llaqtaq plazanpi askha judiokuna juñukuranku jinallataq wawakunapas. Chaypin Bibliamanta yachachiqkuna “Diospa kamachikuynin qelqata kunkayoqta leeranku, t’ijraspankutaq [explicaspankutaq] sut’ita entiendechiranku” (Nehemías 8:1-8).

Phisqa pachaj watakuna jina qhepatan Jesuspas yaqa chhaynallatataq ruwaran. Chayraykun runakunapas “yachachikuq” nispa niranku (Juan 13:13). Jesusqa yachachiqmi ch’ulla runamanpas askha runakunamanpas. Juj kutinmi askha runakunaman orqo patapi yachachiran. Chaypin “runakunaqa yachachikuyninmanta muspharanku” (Mateo 5:1, 2; 7:28). 33 watapin Jesuspa iskay discipulonkuna Jerusalén llaqtaman risharanku, chaypin Jesusqa paykunaman ‘Diospa Simin Qelqaq nisqanta willaran’ (Lucas 24:13-15, 27, 32).

Jesuspa discipulonkunapas Diospa Simin Qelqamanta allin yachachiqkunan karanku. Juj kutinmi Etiopía llaqtamanta runa Diospa Simin Qelqata leesharan. Chayta rikuspan Felipeqa tapuran: “¿Entiendenkichu leesqaykita?”, nispa. Paytaq kutichiran: “¿Imaynatan entiendeyman mana pipas yachachishawaqtin?”, nispa. Jinan Felipeqa leesqanta explicaran (Hechos 8:27-35).

KAY TIEMPOPI YANAPAYKUNA

Ñaupa tiempopiqa karanpunin Bibliamanta yachachiqkuna, kay tiempopipas Jehová Diospa testigonkunan kaqllatataq ruwashanku 239 nacionkunapi llaqtakunapiwan (Mateo 28:19, 20). Sapa semananmi 9 millones más runakunata yanapashanku Bibliata entiendenankupaq. Wakinqa manan Cristopi iñiq llaqtakunamantachu kanku. Gratisllan Bibliamantaqa yachanki, munasqaykiman jinan estudiawaq wasiykipi otaq juj sitiopipas, telefononta otaq internetnintapas.

Bibliamanta cursota chaskiyta munaspaqa Jehová Diospa testigonwan rimay. Reparankin Bibliaqa mana sasa entiendeychu kasqanta. Aswanpas Bibliaqa allinpunin “yachachinapaq, anyanapaq, wanachinapaq, chanin kausayta” yachachinapaqpas. Ajinapin allin preparasqa kanki ‘tukuy allin kaqkunata ruwanaykipaq’ (2 Timoteo 3:16, 17).