Sumaq kausayman aypasun

JEHOVÁ DIOSQA manan munaranchu khaynapi kausananchistaqa, payqa munaran paylla kamachikuq kasqanta respetaq runakunawan junt’a kanantan. Payqa munaran Bibliaq nisqanta kasukuspa payman rijch’akunankutan. Chaymantapas kusisqa familiankuwan thajpi kausanankutan munaran. Diosqa munaranmi imaymanata yachaspa allpantinta paraisoman tukuchinankuta.

DIOSMI PROMETEWANCHIS MUNASQANMAN JINA KAUSAY KANANTA

• “Paymi teqsimuyuntinpi auqa-tinkuykunata qolluchin” (Salmos 46:9).

• “Chayamullantaqmi señalasqa tiempopas, [...] jinallataq allpa pacha malograqkunatapas ch’usaqman tukuchinaykipaqwan” (Apocalipsis 11:18).

• “Sionpi tiyaqkunaqa manan mayqellanpas: ‘Onqosqan kani’ ninqachu” (Isaías 33:24).

• “Ajllakusqaykunaqa llank’asqankuq rurusqantan kusisqa mijunqaku” (Isaías 65:22).

¿Imaynatan Bibliapi willasqankuna cumplikunqa? Jehová Diosmi janaq pachata kay pachatawan kamachinanpaq Jesusta churaran. Biblian nin “Diospa gobiernon” nispa (Daniel 2:44). Chaymantapas Jesustan Jehová Diosqa “trononpi reyta churanqa [...] kamachikuynintaq mana tukukuq kanqa” (Lucas 1:32, 33).

Jesusqa kay allpapi kashaspa milagrokunata ruwasqanwanmi rikuchiran, pay kamachikuq kaqtinqa sumaq kausay kananta.

JESUSQA KASUKUQ RUNAKUNAPAQ IMAKUNA RUWANANTAN RIKUCHIRAN

• Jesusqa imaymana onqoykunatan jampiran, chaywanmi rikuchiran llapa onqoykunata jampiyta atisqanta (Mateo 9:35).

• Jesusqa manchanapaq wayratan thanichiran, chaywanmi rikuchiran wayrata, chijchita jujkunatapas kamachiy atisqanta (Marcos 4:36-39).

• Jesusqa waranqanpin runakunata mijuchiran, chaywanmi rikuchiran askha mijuykuna kananta (Marcos 6:41-44).

• Jesusqa casarakuqpaq wasinpin unuta vinoman tukuchiran, chaywanmi rikuchiran kamachikuyninpiqa kusisqa kausananchista (Juan 2:7-11).

Diosmi munan kasukuq runakuna chhaynapi tiyanankuta, ¿imatan ruwawaq chayman aypanaykipaq? Kanmi juj ‘ñan’ chayninta rinaykipaq. Biblian nin: “Ñañu ñanmi ichaqa kausayman apan, pisillataqmi chaytaqa tarinku”, nispa (Mateo 7:14).

ALLIN KAUSAYMAN APAQ ÑAN

¿Mayqenmi wiñay kausayman apaq ñan? Chay ñanpi puriyqa Diospaq munasqanman jina ruwaymi, paymi niran: “Noqan Diosniyki Señor Diosqa kani, noqan allinniykipaq yachachiyki, noqan purinayki ñantapas pusayki”, nispa (Isaías 48:17). Chay ñanllanta puriymi yanapawasun allinta kausananchispaq.

Jesuspas niranmi: “Noqan kani ñanpas, cheqaq kaqpas, kausaypas”, nispa (Juan 14:6). Jesuspa yachachisqanta kasukuspa ejemplonta qatikuspa iman, Jehová Diosmanqa qayllaykusun, chaymi yanapawasun allinta kausananchispaq.

¿Imaynatan tariwaq kausayman apaq ñanta? Askha religionkunaña kan chaypas Jesusqa kaytan willaranña: “Manan llapa ‘Señor, Señor’ niwaqniychu janaq pacha gobiernomanqa jaykunqa, aswanpas janaq pachapi kaq Yayaypa munayninta ruwaqllan”, nispa (Mateo 7:21). Chaymantapas nillarantaq: “Paykunataqa imachus ruwasqankupin reqsinkichis”, nispa (Mateo 7:16). Biblian yanapasunkiman Diosta munasqanman jina adoranaykipaq (Juan 17:17).

¿Imatan ruwawaq kausay ñanninta purinaykipaq? Kausay qoqninchistan reqsinayki. ¿Pin pay? ¿Iman sutin? ¿Imaynan pay? ¿Imatan ruwashan? ¿Ima ruwananchistan munan? a

Jehová Diosqa manan munaranchu trabajaspa, mijuspa, kusirikuspa, familiayoq ima kaspalla kausananchistaqa. Payqa munan payta reqsispa amigon kananchistan. Kasukuspan rikuchinchis payta munakusqanchista. Jesusmi niran: “Paykuna wiñay kausayta chaskinankupaqqa qan sapallan cheqaq Diostan reqsinanku”, nispa (Juan 17:3).

ÑAUPAQTAQA KAYTAN RUWAWAQ

Cheqaq Diosta kusichinaykipaqqa cambiokunatan ruwanayki kanqa. Qallariypiqa sasapaschá kanqa, chayta ruwayqa viajaytapas qallarishasunman jinan. Astawan Diosmanta yachayta munanki chayqa, Bibliamanta estudiota internetpi www.pr2711.com/quz nisqapi mañakuy, jinan juj Testigo visitamusunki munasqayki horata may munasqaykimanpas.