Jehová Diosmi librawanchis

1, 2. a) ¿Iman kacharipuna wata? (Qhaway “¿Iman kacharipuna wata?” nisqata). b) ¿Imamantan Jesús Lucas 4:16-18 textopi rimaran?

WAKIN nacionkunapin juj rey 50 watata kamachisqanta yuyarinankupaq jatun fiestata ruwanku. Chay fiestatan festejanku mayninpi juj p’unchayta mayninpitaq semanantin otaq masraq. Chay qhepamanmi ichaqa runakuna qonqapunku chay fiestata.

² Israel llaqtapas sapa 50 watatan jatun fiestata watantin festejaranku. Chay fiestatan “kacharipuna wata” nispa niranku, chaypin imaymanamanta librasqa karanku. ¿Imaraykun chay fiestamanta yachananchis? Chay fiestan yuyarichiwanchis imatas Jehová Dios ruwaran wiñaypaq librasqa kananchispaq chayta, kunanpas yanapawashanchisñan. Jesusmi chaymanta sut’ita rimaran (leey Lucas 4:16-18).

3. Levítico 25:8-12 textopi nisqanman jina, ¿imaraykun kacharipuna wata Israel runakunaq allinninpaq karan?

³ Jesuspa nisqanta entiendenapaqqa Israel llaqtaman Jehová Dios kacharipuna watapi imatachus ruwanankupaq kamachisqantan yachananchis. Diosmi niran: “Pisqa chunka kaq watatan noqa Señor Diospaq t’aqankichis, jinaspan suyuntinpi llapa tiyaqkunapaq kacharisqa-kayta willankichis. Chay wataqa kacharipuna watan kanqa, sapankaykichismi chajraykichista jap’ikapunkichis, sapanka kamachitaq familianman kutipunqa”, nispa (leey Levítico 25:8-12). Ñaupaq kaq yachachikuypin yacharanchis imaynatas sábado p’unchayta waqaychasqanku Israel runakunata yanaparan chayta. Kaypitaq yachasunchis imaynatas kacharipuna watata yuyarisqanku paykunata yanapasqanta. Kaypi piensasun, wakin israelitakunan manupi tarikusqankurayku chajrankuta vendepuranku. Kacharipuna watapin ichaqa chajrankuta jujmanta jap’ikapuranku. Chhaynapin chay israelitaqa wawankunaman allpanta saqeyta atiran. Mayninpitaq wakin israelitakuna sinchi manupi tarikusqankurayku pay kikinkuta esclavo kanankupaq vendekuranku otaq wawankutapas. Kacharipuna watapin ichaqa jujmanta familianman kutipuranku. Chay kamachikuyta kasukusqankurayku manaña esclavochu karanku. Chaywanmi Diosqa rikuchisharan serviqninkuna munakusqanta.

4, 5. ¿Imanaqtinmi kacharipuna watamanta yachananchis?

⁴ Kacharipuna wataqa yanaparanmi Israel llaqtapi ama pipas sinchita wajchayananpaq. Jehová Diosmi niran: “Qankuna ukhupiqa mana wajchakuna kanqachu, Diosniykichis Señor Diosmi jap’ikapunaykichispaq qonasuykichis suyupi saminchasunkichis”, nispa (Deut. 15:4). Kunan tiempopin ichaqa qhapaq runakuna astawan qhapaqyapunku wajchakunataq astawan wajchayapunku.

⁵ Cristianokunaqa manañan Moisespa kamachisqanman jinañachu kausanchis. Chaymi kacharipuna watamanta kamachikuyta mana kasunchischu: esclavokunata kacharipuymanta, chajrankuta kutichipuymantapas (Rom. 7:4; 10:4; Efes. 2:15). Chaywanpas kacharipuna watamanta yachaymi yuyarichiwasun imatachus Jehová Dios ruwaran juchamanta librawananchispaq chayta.

JESUSMI WILLARAN LIBRASQA KANANCHISTA

6. ¿Imamanta librasqa kayta necesitanchis?

⁶ Llapanchismi necesitanchis juchamanta librasqa kayta. Juchaq kamachin kasqanchisraykun machuyapunchis, onqonchis, wañunchispas. Chaytan reparakunchis espejopi uyanchista qhawakuspa, onqoqtinchis otaq ima juchatapas ruwasqanchismanta llakikuqtinchis. Apóstol Pablopas reparakuranmi juchaq kamachin kasqanta, chaymi niran: “¡Ay noqa runamanta! ¿Pitaq kay wañuyman aysaqniy cuerpomantari librawanqa?”, nispa (Rom. 7:23, 24).

7. ¿Imatan profeta Isaías willaranña?

⁷ Jehová Diosqa juchamanta librawananchispaqmi Jesusta kay pachaman kachamuran. 700 wata ñaupaqtan profeta Isaiaswan chayta willachiranña. Jehová Diospa chay ruwasqanqa Israel llaqtapi kacharipuna watamantapas aswan allinraqmi kanan karan. Isaiasmi qelqaran: “Señor Diospa espiritunmi junt’aykushawan, paymi ajllakuwaspa jawiwaran wajchakunaman allin willakuykunata willanaypaq. Kachamuwaranmi llakisqa sonqoyoqkunata kusirichinaypaq, presokunaman kacharisqa kanankuta willanaypaq”, nispa (Is. 61:1). ¿Pimantan chay profecía rimasharan?

8. Profeta Isaías kacharichiymanta rimaspa, ¿pimantan willaran?

⁸ Chay profeciaqa junt’akuyta qallariran Diosmanta willayta Jesús kay pachapi qallariqtinmi. Nazaret llaqtanpi sinagogaman rispan profeta Isaiaspa qelqasqanta judiokunaman leeran. Jinaspa niran: “Jehová Diospa espiritunmi noqapi kashan, paymi ajllawaran allin willakuykunata wajchakunaman willanaypaq. Paymi kachamuwaran kacharichisqa kanankumanta presokunaman willanaypaq, ñausakunamanpas qhawarinankumanta willanaypaq; sarunchasqakunata libranaypaq, Jehová Diospa chaskinan watamanta willanaypaqwan”, nispa (Luc. 4:16-19). ¿Imaynatan Jesús chay profeciata junt’aran?

¿PIKUNAN ÑAUPAQTA LIBRASQA KARANKU?

9. ¿Imamantan Jesuspa tiemponpi runakuna librakuyta munaranku?

⁹ Jesuspa tiemponpi runakunan profeta Isaiaspa willasqanman jina kacharichisqa kayta qallariranku. Chaymi Jesús kikinpuni niran: “Kunan p’unchaymi kay leesqay qelqa junt’akun”, nispa. (Luc. 4:21). Jesusta uyariqkunaqa piensarankupaschá Roma llaqtaq kamachisqan kasqankumanta librasqa kanankuta. Yaqachus jina discipulonkunapas chayta piensaranku, chaymi iskay discipulonkuna kinsa wata qhepaman jina niranku: “Noqaykuqa: ‘Paychá Israel llaqtataqa kacharichinqa’ nispan nisharayku”, nispa (Luc. 24:13, 21). Jesusmi ichaqa discipulonkunata mana kamachiranchu Roma llaqta contra jatarinankupaq. Aswanmi paykunata kamachiran: “Roma reypa kaqtaqa Roma reyman qopuychis”, nispa (Mat. 22:21). Chhaynaqa, ¿imaynapin Jesús chay tiempopi runakunata kacharichiran?

10. ¿Imamantan Jesús runakunata libraran?

¹⁰ Ñaupaq kaq, Diospa wawanqa runakunatan yanaparan llulla yachachikuykunamanta pantasqa costumbrekunamantawan librakunankupaq. Chay tiempopin religionpi umallikuna runakunata chaykunawan esclavizaranku (Mat. 5:31-37; 15:1-11). “Runakunatan yanapashayku Diosta adoranankupaq” niq umalliqkunaqa manan allintachu ruwasharanku. Manataqmi Mesiaspa yachachisqanta chaskikurankuchu, chaymi ñausa juchaq kamachin ima kashallaranku (Juan 9:1, 14-16, 35-41). Jesusmi ichaqa llamp’u sonqo runakunaman ruwasqanwan yachachisqanwan rikuchiran imaynatachus pantasqa yachachikuykunamanta librakuyta (Mar. 1:22; 2:23–3:5).

11. ¿Imamantan Jesús runakunata librawallanchistaq?

¹¹ Iskay kaq, Jesusmi runakunata librawanchis juchaq kamachin kasqanchismanta. Jesusmi noqanchisrayku vidanta qoran, sichus pi runapas sacrificakusqanpi iñin, chayman jinataq kausanpas chayqa Diosmi juchanmanta perdonanman (Heb. 10:12-18). Jesusmi niran: “Sichus Churi kacharichisunkichis chayqa, cheqaqtapunin kacharichisqa kankichis”, nispa (Juan 8:36). Chayqa aswan allinmi karan Israel runakuna kacharipuna watapi chaskisqankumantaqa. Kaypi piensasun, juj israelita kacharipuna watapi esclavo kasqanmanta kacharichisqaña karan chaypas, jujmantan esclavo kallanmantaq, llapa runa jinataq wañupuran, Jesuspa librawasqanchismi ichaqa wiñaypaq.

12. ¿Pikunan ñaupaqta beneficiakuranku Jesuspa willasqan kacharichiymanta?

¹² 33 watapi Pentecostés fiestapin Jehová Diosqa santo espiritunta qoran apostolkunaman juj discipulokunamanwan. Chayta ruwasqanwanmi paykunaqa Diospa wawankuna kapuranku, jinaspa qhepaman Jesuswan kuska janaq pachamanta kamachimunqaku (Rom. 8:2, 15-17). Paykunan ñaupaqta beneficiakuranku Jesús Nazaret llaqtaq sinagoganpi willasqan profeciamanta. Manañan llulla yachachikuykunaman, pantasqa costumbrekunamanpas watasqachu karanku, chaykunatan judío religionpi umalliqkuna yachachiranku. Chaymantapas Diosqa paykunatan libraran juchamanta wañuymantawan. Jehová Dios runakunata librasqanqa 33 watapin qallariran Jesuspa discipulonkunaman santo espiritunta qospa, chayqa tukunqa Jesús waranqa watata kamachisqan qhepamanmi. ¿Imakunamantan librawasun chay tiempokama?

MILLONNINPI RUNAKUNA LIBRASQA KANKU

13, 14. Janaq pachaman riq cristianokunamantapas, ¿pikunan chaskillankutaq Jesuspa willasqan kacharichiyta?

¹³ Kay tiempopiqa askha nacionkunamanta runakunan “waj ovejamanta” nisqa kanku. (Juan 10:16). Paykunaqa manan Jesuswan kuskachu janaq pachamanta kamachimunqaku, aswanmi paykunaqa suyakushanku wiñaypaq kay allpapi tiyayta. ¿Chaytachu noqanchispas suyakushanchis?

¹⁴ Noqanchispas janaq pachaman riq cristianokuna jinan juchanchismanta perdonta mañakuyta atinchis Jesuspa sacrificakusqanpi iñisqanchisrayku. Jinaspa Jehová Diospaq allin qhawarisqaña kanchis allin concienciayoqtaq kanchispas (Efes. 1:7; Apo. 7:14, 15). Chaymantapas librakunchisñan pantasqa yachachikuykunamanta, creenciakunamantapas. Jesusmi niran: ‘Reqsinkichismi imachus cheqaq kasqanta, chay cheqaq kaqtaqmi kacharichisunkichis’, nispa (Juan 8:32). Chay kausayqa anchatan kusichiwanchis.

15. ¿Imamantan librakusun jamuq tiempopi? ¿Ima bendicionkunatan chaskisun?

¹⁵ Jamuq tiempopiqa aswan libreraqmi kasunchis. Pisi tiempollamantan Jesusqa llapa pantasqa religionkunata, llapa gobiernokunatawan chinkachipunqa. Jehová Diosmi ichaqa ancha askha serviqnin runakunata pakaykunqa, jinaspa kay allpapi sumaq bendicionkunata qonqa (Apo. 7:9, 14). Chaymantapas askha runakunan kausarimpunqaku, paykunamantan kanqa Diosta servinankupaq mana servinankupaqpas. Diosta servispaqa manañan onqonqakuchu, machuyanqakuchu, nitaq wañunqakupaschu (Hech. 24:15).

16. ¿Imamantan runakuna kacharichisqa kanqaku jamuq tiempopi?

¹⁶ Waranqa watata Jesús yanapaqninkunawan kamachisqanpin runakuna ch’uya mana juchayoq kapunqaku chayraqmi Diospa wawankuna kanqaku. Chaymi comparakunqa kacharipuna watapi pasasqanwan. Jehová Diosta llapa kasukuqkunan mana juchayoq, ch’uya cuerpoyoq, ch’uya yuyayniyoq kapunqaku.

17. Isaías 65:21-23 textopi nisqanman jina, ¿imaynatan kausanqaku Diosta serviq runakuna? (Tapanpi kaq fotota qhaway.)

¹⁷ Isaías 65:21-23 (leey) textopin willashan imaynachus kay allpapi kausay kananmanta. Jehová Diosta serviqkunaqa manan mana imata ruwaspachu kasunchis, aswanmi Biblia willan sumaq llank’anayoq kananchismanta. Waranqa wata tukuytaqa llapa Diosta serviq runakunan ‘ismusqa kayman watasqa kasqankumanta kacharichisqa kanqaku, jinaspa Diospa wawankuna jina libre kapunqaku’ (Rom. 8:21).

18. ¿Imaynapin yachanchis jamuq tiempopi sumaq kausay kananta?

¹⁸ Imaynan Jehová Dios Israel llaqtata kamachiran llank’anankupaq samanankupaqpas, chhaynatan jamuq tiempopi llaqtanwan ruwallanqataq. Imaynan kunan tiempopi Diosta servispa kusisqa kausanchis, chhaynallataqmi jamuq tiempopipas kanqa. Diosta serviqkunaqa kusisqan kausanqaku sumaq llank’anayoq kasqankurayku Jehová Diosta servisqankurayku ima.