Familiapi umalliq, familiaykita yanapay allin iñiq kanankupaq

¹ Profeta Danielqa unay watatan Babilonia llaqtapi tiyaran. Chay llaqtapi runakuna ídolo yupaychaq, millay kawsaqña karanku chaypas, payqa Diosta tukuy sonqowan serviq runamanta reqsisqan karan (Dan. 6:16, 20). ¿Imatan ruwaran iñiyninpi mana pisipananpaq? Bibliaq nisqanman hinan profeta Danielqa sapa p’unchay imaymanata ruwaspa Diosta serviran. Payqa sapa p’unchaymi altos wasinta haykuspa kinsa kutita Diosmanta mañakuq (Dan. 6:10). Chaymantapas sapa p’unchaychá Kamachikuy Simita leeran. Chaymi wañuchiytaña munaranku chaypas, mana Jehová Diosmanta karunchakuranchu. Chhayna kasqanraykun Jehová Diosqa milagrota ruwaspa payta pakaykuran (Dan. 6:4-22).

² Kunan tiempopipas kallpachakunanchismi ‘rikch’asqalla’ kananchispaq (Efe. 6:18). Kay pachaqa “saqraq munaychakusqan[mi]” kashan (1 Juan 5:19). Chayraykun qonqaylla ima pruebapipas tarikusunman. Manchay ñak’ariypin Gog nisqa Satanasqa Diospa serviqninkunaq contranpi hatarinqa. Runaq qhawarinanpaqqa manan pipas paykunata hark’ayta atinqachu. Chayraykun Diosta serviqkunaqa tukuy sonqowan Jehová Diosman hap’ipakunanku kanqa (Eze. 38:14-16).

³ 1998 watapin hatun huñunakuypi rikuranchis “Familiakuna, sapa p’unchay Bibliata leespa Diospa ñanninpi puriychis”, nisqa dramata. Chaypin nikuran: “Familiapi kaqkunaqa allintan rimanakunanku ima p’unchaychus Biblia estudianankuta, hinaspa rikushankumanpas hina Bibliata leenanku, estudiananku ima. Chay rimanakusqankuman hinapuni Bibliata estudianqaku chayqa, allinninkupaqmi kanqa. Astawanmi Bibliamantapas yachanqaku, iñiyninkupas astawanmi wiñarinqa. Chaymantapas ñawpa tiempopi Dios sonqo runakunamanta yachaspaqa anchatan kallpachakunqaku mana manchakuspa Diosmanta rimanankupaq”, nispa. ¿Imakunatan familiakuna ruwananku allin iñiq kanankupaq? Chaymantan kunan yachasunchis. Chaykunamanta yachasqanchisman hinan familiapi umalliqkunaqa yuyaymanananku imaynatachus familiankuta yanapankuman chayta.

⁴ Sapa p’unchaymi Bibliata leena: 2001 watamanta Examinando las Escrituras diariamente nisqa folletopi, 11 p’unchay septiembre killapin khaynata nikuran: “Diospa kamachikunan tiempo chayamuqtinqa, paypa munayninmi kay pachapi ruwakunqa, imaynan hanaq pachapipas ruwakun hinata. Chay tiempopiqa manañan mana khuyapayaq runakunaqa kanqachu; manan animalkunapas pitapas imananqakupaschu (Isa. 11:9; Mat. 6:9, 10)”, nispa. ¡May allinpunichá chay textoqa karan chay p’unchaypaq! Taytakuna, ¿sapa p’unchaychu familiaykiwan kuska Examinando nisqa folletota t’aqwishanki? Chay ruwayqa ancha allinmi. Sichus tutaymanta tiempo mana aypasunkichu chayqa, mayqen horatapas chaytaqa ruwawaqmi. Huk taytan niran: “Ñoqaykuqa cenasqayku horatan Examinando nisqa folletota qhawariyku, chay horasmi ñoqaykupaqqa aswan allin”, nispa.

⁵ Sichus sapa p’unchayña familiaykiwan kuska Examinando nisqa folletota estudiashanki chayqa, kusapunin chay ruwasqaykiqa. ¿Imatawanmi ruwawaq? Yaqapaschá kikin Bibliamantapuni wakin textokunata leewaq. Wakinqa mayqen capitulomantachá chay p’unchaypaq textota akllakuran chaytan leenku. Wakintaq Bibliapi huk librota akllanku, hinaspa sapa p’unchay pisi-pisimanta chayta leenku. Sichus sapa p’unchay familiaykiwan kuska Bibliata leenki chayqa, familiaykitan yanapashanki Jehová Diosta manchakunankupaq, tukuy sonqowan paypa munayninta ruwanankupaqwan (Deu. 17:18-20).

⁶ Familiaykiwan kuska Bibliata, Examinando nisqa folletota ima leesqaykichis qhepamanqa, pisillapi rimay imaynatachus chaykuna yanapasunkichisman chayta, chhaynapin chay ruwasqaykichis aswan allin kanqa. Benefíciese nisqa libron 60 paginapi nin: “Sapa semanapaq Biblia leesqanchismantan wakin textokunata akllawaq, hinan chaymanta rimaspa khaynata tapuwaq: ‘¿Imaynatan yanapawasunman kay textokuna? ¿Imaynatan yanapawasunman predicayninchispi? ¿Imatan kay textokuna yachachiwanchis Jehová Diosmanta? ¿Imaynatan yanapawanchis payta astawan munakunanchispaq?’”, nispa. Chhaynata tapuspan familiaykita yanapashanki “imachus Señorpa munaynin kasqanta allintapuni repara[nankupaq]” (Efe. 5:17).

⁷ Familiapi estudiasqaykichis: Taytakunaqa sapa semanan familiankuta estudiachinanku, chaywanmi wawankunata rikuchinku Diosmanta yachay ancha allin kasqanta. Huk wayna cristianomasinchismi nin: “Mayninpiqa sinchi sayk’usqallañan papaykuqa llank’ananmanta chayamuq, chhaynaña kaqtinpas manapunin payqa estudiachiwanankutaqa saqeranchu. Chhaynatan allinta yachachiwaranku familiawan kuska estudiay ancha importante kasqanta”, nispa. Wawakunapas yanapakunkumanmi chayta ruwakunanpaq. Huk taytapas señorantinmi isqon wawakunantin ima las cincota hatarinku, chhaynapi kuska Bibliata estudianankupaq, chay ratulla tiemponku kasqanrayku.

⁸ Familiaykiwan kuska Bibliata estudiasqayki allin kananpaqqa allintan qhawarinayki imaynachus yachachisqaykita (1 Tim. 4:16). Benefíciese nisqa libron 31, 32 paginanpi nin: “Familiaykiwan kuska allinta estudianaykipaqqa, allintaraqmi familiaykita qhawarinayki imayna kasqankuta. ¿Allintachu señorayki wawaykikunapas Jehová Diosta servishanku? Wawaykikuna predicaq lloqsiqtinku, ¿mana manchakuspachu Jehová Diospa testigon kasqankuta reqsichikunku compañeronkunaman? ¿Llapankuchu kusikunku Bibliata estudianaykichis hora chayamuqtin? ¿Jehová Diospa munasqanman hinapunichu tukuy imatapas ruwanku? Allin reparaq kanki chayqa, yachankin familiaykita imayna yanapayta, chhaynapi Diosta allinta servinankupaq”, nispa.

⁹ Huñunakuyninchiskuna: Allintan familiaykiwan rimanakunaykichis huñunakuykunaman mana faltakunaykichispaq, allin preparasqa rinaykichispaq ima (Heb. 10:24, 25). Yaqapaschá wakin huñunakuyninchiskunapaq paykunawan kuska preparakuwaq. Allinmi kanman ñawpaqmantapacha preparakuqtiykichisqa. Chaypaqqa allintan rimanakunaykichis hayk’aqchus ima horatachus preparakunaykichista, chhaynapin allin preparasqa kankichis, astawantaqmi kallpachakunkichis huñunakuykunapi (Pro. 21:5).

¹⁰ Chhaynaqa, allintan preparakunanchis huñunakuyninchiskunapaq, manataq saqenanchischu ima horapi chayta ruwananchistapas. Sichus qanpaq sasa kanman huñunakuykunapaq preparakuy chayqa, ¿imatan ruwawaq? Benefíciese nisqa libroq nisqanman hinan ruwanayki, 31 paginapin nin: “Huñunakuykunapaq preparakuspaqa ama ‘preparasqan kashani’ ninaykiraykullachu hawan ukhuntaqa preparakuy, amataq niychu: ‘Manataq llapantachu preparakuyta atisaq chayqa, amaña aswanpas preparakusaqchu’, nispaqa. Chhayna ninaykitaqa ñawpaqmanta yuyaykuy maykama estudianaykita chayman hinataq allinta estudiay. Chaytaqa sapa semanan ruwanayki, tiempoq pasasqanman hinataq llapa huñunakuykunapaq preparakunayki”, nispa.

¹¹ Sichus manaraq huñunakuy qallarishaqtin huñunakuna wasiman llapa familiantin chayankichis chayqa, allin preparasqan kankichis Jehová Diosta hatunchanaykichispaq hinallataq yachachisqanta allinta uyarinaykichispaqwan. ¿Chaytachu familiantin ruwashankichis? Chayta ruwanapaqqa allintan familiaykiwan rimanakunayki yanapakunaykichis ima. Wakin familiakunapiqa manan ratullachu alistakunku huñunakuyman rinankupaq, chaymi comunta imatapas ruwarparinku mana tardiyachikunankupaq. Sichus chay pasashan familiaykipi chayqa, kallpachakuychis allin horariota ruwakunaykichispaq. Yaqapaschá wakin ima ruwanaykichistapas ñawpaqmantapacha ruwawaqchis. Familiaykipi pillapas askha ruwanayoq kashan chayqa, hukkunapaschá yanapankuman imachus ruwananta usqhaylla tukunanpaq. Chaymantapas yaqapaschá tiempowan alistakuwaqchis, chhaynapi mana apurasqa rishanaykichispaq. Sichus wasipi otaq huñunakuna wasipipas maychus ruwakunanta hina imatapas ruwasun chayqa allin hukllachasqan kasunchis (1 Cor. 14:33, 40).

¹² Wasin wasinta predicayninchis: Wasipi umalliqkunaqa huk horariotan ruwanallankutaq ima p’unchaychus predicaq lloqsinankupaq. Chaypaq rimasun Jayson sutiyoq cristianomanta, paymi nin: “Tayta mamayqa sapa sabadonmi predicaq pusawaqku, chay ruwasqankun allinta yanapawaran predicashanallaypaq, chaymantapas sapa predicaq rispaymi reparakurani chay ruway ancha allinpuni kasqanta, astawantaq kusikuqpas karani chaykuna ruwasqaymanta”, nispa. Cristianokunaq wawan askha wayna sipaskunan reparakunku predicanapaq huk horario ruwakuy allinpuni kasqanta, chaymantapas chaykuna paykunata yanapasqantawan.

¹³ Predicacionman rinapaq preparakuypas ancha allinpunin, chhaynapin llapa familiantin kusisqa predicankichis, ¿imatan chaypaq ruwawaq? 1999 watamanta 1 julio killamanta La Atalaya nisqa revistapin chaymanta rimashaspa niran: “Sapa kutintaq familiaykiwan Bibliata estudianki chayqa, yaqapaschá mayqen estudiopipas rimawaq predicanapaq imayna preparakunamanta. Sichus chayta ruwanki chayqa allinpunin kanqa (2 Timoteo 2:15). Familiaykitan yanapanqa allin predicaq kanankupaq. Mayninpiqa yaqapaschá familiapi estudiaspa chayllamanta rimawaqchis. Sapa estudiota tukuspataq pisillapi rimawaq predicacionpi imakuna ruwanamanta; mana atikuqtintaq semanapi mayqen p’unchaypipas chaymanta rimawaq”, nispa. ¿Chay revistaq nisqanman hinachu ruwashanki?

¹⁴ Ñawpaqman purishallasun: ¿Kaypi yachasqanchisman hinachu familiayki imatapas ruwashan? Chhayna kaqtinqa familiaykita niy: “Allintan ruwashankichis”, nispa; kallpachakuytaq familiaykita aswan allinta yachachishanaykipaq. Sichus reparanki imakunapi allinyanaykichista chayqa, yaqapaschá chaykunamanta familiaykiwan rimawaq chaykunapi allinyanaykichispaq. Sichus familiayki chay rimasqaykichisman hinaña imatapas ruwashanku chayqa, hukmanta rimallaytaq paykunawan hukkunapiñataq allinyanaykichispaq. Chaytaqa allin yuyaywan ruway, amataq iskayaychu familiayki allinyananpi (Fili. 4:4, 5). Yaqapaschá sasa kanman familia allin iñiq kananpaq yanapayqa, ichaqa allinpunin chay ruwayqa. ¿Imarayku? Jehová Diosmi nin: “Chanin ñannillaytapuni puriqtaqa ñoqan qespichisaq”, nispa (Sal. 50:23).