Allin kaqta ruwashallasunpuni hinan askha saminchaykunata chaskisun
1. ¿Tiempoyki allichakusqaykita ima rayku qhawarishanallaykipuni?
1 Cristiano kayniykita qallarishaspaqa ñak’aytachá tiempoykita allichakuranki Bibliata estudianaykipaq, huñunakuykunaman rinaykipaq, predicanaykipaq, Diosmanta mañakunaykipaqpas. Ahinatan Jehová Diospa saminchayninwan iñiyniykipi wiñaranki. Kunanqa askha watañachá karun bautizakusqaykimanta, ichaqa ¿chay allin ruwasqaykikunata kunankamapas ruwashallankipunichu?
2. ¿Imaynatan sapa p’unchay Biblia leesqanchis yanapawasunman?
2 Allichakusqaykita qhawarikuy: ¿Sapa p’unchaychu Bibliata leeshanki? Askha saminchaykunatan chaskinchis chayta ruwaqtinchisqa (Jos. 1:8; Sal. 1:2, 3). Israel llaqta reykunaqa “tukuy kawsasqanku p’unchaymi” leeshanallanku karan Kamachikuy Simi qelqakuna copiasqankuta. ¿Ima raykutaq chaytari ruwananku karan? Huch’uyaykukuq sonqoyoq kanankupaq, Jehová Dios manchakuyta yachanankupaq, kamachikuyninkunamanta ama t’aqakunankupaqpas (Deu. 17:18-20). Noqanchistapas sapa p’unchay Bibliata leesqanchisqa yanapawasunmi kay q’ewisqa waqllisqa pachapi mana huchachana kananchispaq, ch’uya sonqo kananchispaq, predicaypi allin-allin wakichisqa kananchispaqpas. (Fili. 2:15; 2 Tim. 3:17).
3. ¿Ima saminchaykunata chaskinchis sapa kutilla huñunakuykunaman rispanchis?
3 Jesusqa haykullaqpunin sinagogaman Diospa Simin Qelqa leesqankuta uyariq (Luc. 4:16). Chayqa kallpacharanpunichá muchunan pruebakunata atipananpaq. Noqanchispas kallpachakunchismi huñunakuypi yachachikusqata uyarispa, wayqe-pananchiskunawan rimanakuspapas (Rom. 1:12). Paykunawan huñunakuyqa yanapawasunmi kay p’uchukay tiempopi sasachakuykunata aguantananchispaq (Heb. 10:24, 25). ¿Kunankamapas rishallankipunichu sapanka huñunakuykunaman?
4. ¿Sapa semana predicasqanchis imaynatan yanapawanchis?
4 Biblian niwanchis apostolkunaqa “Dios yupaychana wasipipas iñiqkunaq wasinkunapipas sapa p’unchay” willashallaqkupuni allin willakuykunata (Hech. 5:42). Manaña sapa p’unchaychu predicayta atisunman chaypas, ¿kallpachakusunmanchu sapa semana imaymanamantapas servicionchista ruwananchispaq? Chayta ruwaspaqa aswan allintan yachachisun Diospa Simin Qelqawan, sumaq experiencianchiskunapas kanqa chhayna ruwasqanchismanta.
5. ¿Ima raykun Jehová Diosmanta mañakushanallanchispuni?
5 Askha saminchaykunatan profeta Danielqa chaskiran ‘tukuy sonqonwan’ Jehová Diosta servisqanmanta. Payqa Jehová Diosmanta mañakullaqpuni karan (Dan. 6:10, 16, 20). Sichus Jehová Diosmanta tukuy sonqo mañakushallasun chayqa, santo espiritunwanmi saminchawasunchis (Luc. 11:9-13). Hinaspapas payqa asuykamuwasunmi, ahinapin paypa amigon kasun, sonqota tupachisun (Sal. 25:14; Sant. 4:8). ¡May allinmi chayqa! Chay hinaqa, kallpachakusunchisyá espiritual kaqkunata ruwashanallanchispaq, ahinapin Jehová Diosmanta askha saminchaykunata chaskisunchis.