Usqhayta llank’asun
1 Jesusqa yacharanmi Papanpa munaynin ruwananpaq pisi tiempolla kay Allpapi kasqanta (Juan 9:4). Chayraykun payqa usqhayta llank’aran, discipulonkunamanpas chaytan yachachiran (Luc. 4:42-44; 8:1; 10:2-4). Diospa munaynin ruwaytan payqa ñawpaqman churaran (Mat. 8:20). Chaymi payta yanaparan Jehovaq kamachisqan ruway tukunanpaq (Juan 17:4).
2 Pisillan tiempoqa. Allin noticiakuna “pachantinpi willasqa” kananpaq tiempoqa pisillañan (Mat. 24:14). Bibliapi profeciakunan willawanchis tukukuy tiempopiña kawsasqanchista. Pisi tiempollamantan Payqa, ‘Diosta mana reqsiqkunata, Señorninchis Jesucristomanta allin willakuykuna mana kasukuqkunatawan muchuchinqa [“wiñaypaq wañuchinqa”, NM]’ (2 Tes. 1:6-9). Chay juicioqa qonqayllamantan chayamunqa (Luc. 21:34, 35; 1 Tes. 5:2, 3). Runakunaqa cuentatan qokunanku vidanku peligropi kasqanta, ñoqanchistaq paykunata yanapananchis tiemporaq kashaqtin Jehová Diospa favornin maskhanankupaq (Sof. 2:2, 3).
3 Tukuy atisqanchista ruwasun. ‘Pisi tiempollaña kasqanta’, yachaspan Diosta serviqkunaqa askha predicanankupaq tiempota hap’inku (1 Cor. 7:29-31; Mat. 6:33). Wakinqa atishaspan mana munankuchu qhapaqyayta, otaq paykunaq munasqallanku maskhaytapas, aswanmi astawan predicanankupaq afanakunku (Mar. 10:29, 30). Hukkunataq mana tukukuq pruebakunaña kaqtinpas munanku “Señorpa llank’ananpi aswan-aswanta llank’a[yta]” (1 Cor. 15:58). Askha wayqe panakunan mana iskayaspa unay tiempoña allin noticiakunata willanku (Heb. 10:23). Jehovaqa manan qonqanchu paypa Reinonrayku imapas ruwasqankuta (Heb. 6:10).
4 Diosta adoranapaq kawsasqanchismi, predicanapaq tiempo qokusqanchispiwan yanapawanchis Jehovaq p’unchayninta mana qonqananchispaq. Hark’awanchismi Satanaspa mundonpa pantachiwananchismanta, kallpachawanchistaq kawsayninchispi ch’uya kananchispaqpas (2 Ped. 3:11-14). Usqhay llank’asqanchismi yanapawasun salvakunanchispaq uyariqninchiskunaq salvakunanpaqpas (1 Tim. 4:16).