Soqta kaq parte: Estudiante tapuqtin
Diosta servinankupaq hina estudiota qosun
1 Piwanpas Bibliata estudiashanchisña chayqa qallariymantapachan yachachinanchis, manan huk temamanta huk temamanchu pasananchis. Chaymi estudianteqa Bibliamanta cheqaq yachasqanta sonqonpi allinta takyachinqa hinaspa espiritualpi wiñanqa (Col. 1:9, 10). Mayninpiqa, estudiashaqtinchismi estudiante tapunman. ¿Imaynatan kutichinanchis?
2 Yachanaykin, ima niyta. Estudiasqaykichis temamanta tapuqtinqa kutichiwaqpachan, sichus estudiasqaykichis libropas, folletopas chay temamanta riman chayqa qhawarichiy chay paginata. Estudiasqaychis temawan mana tupaqtinqa otaq sasa kutichina kaqtinqa, estudiayta tukuspa otaq huk p’unchaypas chaymanta rimaychis. Wakin publicadorkunaqa estudianteq tapusqantan qelqanku, chaymi rikuchin tapusqanpi interesakusqankuta, manan ichaqa estudiasqankuta saqespachu tapusqanmanta rimanku.
3 Qallariymantapacha mosoqkunata yachachinapaqmi, qelqanchiskunaqa imaymana temakunata Bibliamanta chaninta yachachin. ¿Imatan ruwawaq estudiante pantasqa yachayman hap’ipakuqtin otaq Bibliaq yachachisqanwan mana convencikuqtin? Chhayna kaqtinqa, chay temamanta rimaq qelqanchiskunawan yanapachikuspan Bibliaq nisqanta allinta entiendechina. Chaywanpas mana convencikuqtinqa, rimanakuychis chay temamanta huk kutipi parlanaykichispaq, ama ichaqa estudiasqaykichista saqeychischu (Juan 16:12). Bibliamanta astawan yachaspa, espiritualpipas wiñasqanman hinan, mana entiendesqan temata entiendenqa.
4 Ama imaymana yachaqmanchu tukuy. Estudianteq tapusqanta mana yachaspaqa, ama hawan ukhuntachu kutichiy (2 Tim. 2:15; 1 Ped. 4:11). Aswan niy, tapuwasqaykipaq kutichiyta maskhaspa kutimusaq chaymanta rimananchispaq, nispa. Atispaqa yachachiwaqmi tapusqanpaq kutichiyta pay kikin maskhananpaq, chhaynapin paypas pisi pisillamanta yachanqa Jehová Diospa organizacionninpa qowasqanchis qelqakunapi maskhayta. Tiempowanqa pay kikinmi maskhanqa tapukuyninkunapaq kutichiykunata (Hech. 17:11).