Pusaq kaq parte: Biblia estudiaqkunata pusana Diospa llaqtanman
Diosta servinanpaq hina estudiota qosun
1. ¿Imaraykun allin kanman sapa semana Bibliamanta yachachisqanchisman, Jehová Diospa allichasqa llaqtanmanta yachachiy?
1 Bibliamanta yachachispaqa manan yachanallankutachu munanchis, yanapanallanchistaqmi cristiana congregacionpi paykunapas kanankupaq (Zac. 8:23). Kaypaqqa allinmi kanman Los testigos de Jehová: ¿quiénes son y qué creen? nisqa folleto, mosoq estudiantekunaman qoy kay folletota, kallpachaytaq leenankupaq. Diospa llaqtan imayna allichasqa kasqanmanta yachachinaykipaq t’aqay iskay kinsa minutota sapa semana.
2. ¿Imaynatan kallpachasunman Biblia estudiaqkunata huñunakuyman hamunankupaq?
2 Congregacionpi huñunakuykuna: Bibliamanta estudiantekuna Diospa llaqtanta munakunankupaqqa ñawpaqtan ñoqanchiswan kuska congregacionpi huñunakuyman rinanku (1 Cor. 14:24, 25). Chayraykun semanapi pisqantin huñunakuymanta ch’ulla ch’ullamanta yachachinanchis. Hamuq semanapi discurso publicoq temanta willay. Qhawarichiy ima temamantan yachakunqa La Atalaya Estudiopi, Libro de Congregación Estudiopipas. Willay imatan ruwakun Escuela del Ministerio Teocraticopi, Serviciopaq Huñunakuypipas. Escuelapi discursoyki kaqtinqa ensayawaqmi paykunawan. Willay huñunakuykunapi allin puntokuna uyarisqaykimanta. Yanapay qelqanchiskunapi fotokunata qhawachispa imaynatan ruwakun huñunakuykuna. Estudio qallarichisqaykimantapacha pusamuy huñunakuykunaman.
3. ¿Diospa llaqtanpi ima ruwaykunamantan rimasunman?
3 Jesuspa wañusqan Yuyarina p’unchay, asambleakunapas, otaq circuitopi superintendente visitawananchispas qayllaykamushaqtinqa, iskay kinsa minutopi willay imakunan chay p’unchaykunapi ruwakunqa chaywan estudiantekuna kallpachankunapaq. Pisi pisillamanta yachachiy kaykunamanta: ¿imaraykun Jehovaq testigonkuna nisqa sutiwan sutichakunchis?; ¿imaraykun huñunakusqanchis wasita ninchis Salón del Reino nispa?; ¿imakunatan ruwananku ancianokunapas, siervo ministerialkunapas?; ¿imaynatan allichakun predicanapaq, maykunapi predicaypas?; ¿imaynatan ruwakun qelqanchiskuna?; ¿ima qolqewanmi gastokunata ruwan Diospa llaqtan?; ¿imatan ruwan sucursalpas, Cuerpo Gobernantepas predicakunanpaq?
4, 5. ¿Imaynatan videonchiskunawan yanapasunman hukkunapas Diospa llaqtanta astawan munakunankupaq?
4 Yachachinapaq videokuna: Estudiantekunaqa reqsillankumantaqmi Jehová Diospa sumaq llaqtanta videonchiskunawan. Chaypaqqa kay videokunatan qhawachisunman: Hasta los cabos de la Tierra, Toda nuestra asociación de hermanos, Unidos gracias a la enseñanza divina nisqa videokunata. Huk warmin pisqa wataña revistanchiskunata, huk qelqanchiskunatapas chaskisqa, Los testigos de Jehová... la organización tras el nombre nisqa videota qhawaspataq kusikuymanta waqasqa. Visitaqnin testigokunapin hap’ipakusqa, video rikusqan qepatataq Diospa llaqtanmanta hap’ipakapusqa. Paywanmi qallarisqa estudiayta, qatimuq semanapitaq Salón del Reinopi huñunakuyman risqa.
5 Kaykunamanta sapa semana iskay kinsa minutollatapas rimasun Biblia estudiachisqanchiskunawan qelqanchiskunawanpas yanapachikuspa chayqa, pusasunmanmi pisi pisillamanta Jehová Diospa llaqtanman.