Hukkunata yanapasun kacharichiymanta beneficiakunankupaq
Cristoq wañusqanta 12 de abril p’unchayta yuyarisun
1. Willay imaynatan Diospa siervonkuna rikuchinkuman kacharichiymanta agradecekusqankuta.
1 “¡Diosman gracias kachun mana niy atina qokuyninmanta!” (2 Cor. 9:15.) Kay simin ch’uyatapuni rikuchin, imaynata sientekunchis Dios munakuwaspanchis Churin Jesucristowan kacharichiwasqanchismanta. Diospa qokuynin agradecesqanchista rikuchisunmanmi Cristoq wañusqan Yuyarinaman rispa, 12 de abril p’unchayta yuyarikunqa.
2. ¿Jehová Diospa siervonkunamantapas pikunaraqmi Yuyarinaman rinku, imatan ruwananku kacharichiymanta beneficiakunankupaq?
2 Jehová Diospa siervonkunamantapas yaqa chunka millón runakunaraqmi sapa watan Yuyarinaman rinku. Risqankuwanmi pisillapipas rikuchinku Jesucristoq kacharichiynin agradecekusqankuta. Ichaqa saminchaykuna chaskinankupaqqa kacharichiypi iñinanku (Juan 3:16, 36). ¿Imaynata yanapasunman iñiyninkuta wiñachinankupaq? Yuyarina qayllan p’unchaykunapi kallpachasunmanmi Bibliata estudianankupaq, sapa semana huñukuykunaman rinankupaqpas. Qatiqninpi yachasun imayna ruwayta.
3. ¿Imaynata estudiota qallarisunman Yuyarinaman mink’akushaspa?
3 Bibliamanta estudiokuna: Yuyarinaman riy munaqta mink’akushaspaqa, ¿Enseña, nisqa librowan estudiota qallariwaqchu? Willay imayna estudio ruwanamanta, qhawachiytaq “La Cena del Señor: una celebración que honra a Dios”, nisqata (págs. 206-208). Chaytaqa huk otaq iskay kutillapi t’aqwiwaqchis wasi punkupi estudiaq hinalla. Tukunaykipaqqa uyariqniyki munanqapaschá 5 capitulopi “El rescate, el mayor regalo de Dios”, nisqata estudiayta. Bibliamanta estudio takyaqtinqa tawantin ñawpaq kaq capitulokunata estudiawaqchis.
4. ¿Pikunawanmi estudiokunata qallarisunman Yuyarina qayllan p’unchaykunapi?
4 ¿Pikunawan estudiayta qallarisunman chhaynata? Llank’aqmasinchiskunawan, escuelapi yachaqmasinchiskunawan, wasimasinchiskunawanpas, chaykunamanta rimayta munaqtinkuqa. Wayqenchiskuna rimankumanmi pananchiskunaq mana iñiq qosankuwan. Chaymantapas manan qonqananchischu mana iñiq familianchista. Astawanraqqa Yuyarinaman mink’ananchis manaña predicaq wayqe-pananchiskunata (Luc. 15:3-7). Kacharichiymanta llapanku beneficiakunankupaq imayna yanapanapaq yuyaykusun.
5. ¿Imaynata kallpachasunman Biblia estudiaqkunata, hukkunatapas sapa semana huñukuykunaman rinankupaq?
5 Congregacionpa huñukuyninkuna: Askha estudiaqkuna, huk runakunapas Yuyarina huñunakuymanmi ñawpaqta rinku. ¿Imaynata kallpachasunman wakin kaq huñukuykunaman rinankupaq? Abril de 2005 Reinopaq Servicionchispi, 8 paginapi nin: “Hamuq semanapi discurso publicoq temanta willay. Qhawarichiy ima temamantan yachakunqa La Atalaya Estudiopi, Libro de Congregación Estudiopipas. Willay imatan ruwakun Escuela del Ministerio Teocraticopi, Serviciopaq Huñunakuypipas. Escuelapi discursoyki kaqtinqa ensayawaqmi paykunawan. Willay huñunakuykunapi allin puntokuna uyarisqaykimanta. Yanapay qelqanchiskunapi fotokunata qhawachispa imaynatan ruwakun huñunakuykuna. Estudio qallarichisqaykimanta pacha pusamuy huñunakuykunaman”, nispa.
6. ¿Imaynata allin sonqoyoq runakunata yanapasunman, kacharichiymanta beneficiakunankupaq? Willay iskayta.
6 Allin sonqoyoq runakunachus Bibliata estudianqaku, llapan huñukuykunamanpas rillanqakutaq chayqa, espiritualpi usqhaylla wiñanqaku. Chay hinaqa, hukkunata kallpachasun kaykunawan yanapachikunankupaq, kacharichiymantapas beneficiakunankupaq, kaymi Diospa aswan hatun qokuynin.