Familiapaq horario: familiantin predicanapaq
1 Jehová Diosqa munanmi wayna sipaskuna sutin hatunchananta (Sal. 148:12, 13). Jesuspa tiemponpipas ‘huch’uy wawakuna ñuñuq wawakunapas’ hatuncharankun Diosta (Mat. 21:15, 16). Hinallataqmi kunanpas. ¿Qankunapas tayta mamakuna imaynatan yanapawaqchis wawaykichista, Jehová Diosta tukuy sonqowan predicacionpi hatunchanankupaq? Kawsayniykichispin rikuchinaykichis, kaytaqa yacharanchisñan huñunakuymanta willaq temapi. Askha tayta mamakunaq rimasqanmantan huk runa kayta niran: “wawakunaqa manan nisqanchistachu ruwanku, aswanpas rikusqankutan” nispa.
2 Diosta manchakuq tayta mamawan uywasqa hermanan nin: “Sábado tutamanta hatarispaqa manan hayk’aqpas tapunakuraykuchu predicacionman lloqsinaykupaqqa, yacharaykun lloqsinaykutaqa” nispa. Chhaynallataqmi tayta mamakunapas sapa semanapaq horariota ruwaspa, wawankuta yachachinanku familiantin predicaq lloqsinankupaq. Chayta ruwaspaqa, manan kawsayllaykichiswanchu yachachinkichis, aswanpas rikullankichistaqmi wawaykichis imayna kasqanta, conductanta, imakuna atisqankutapas.
3 Espiritualpi wiñanankupaq preparay. Wawaykikuna kusisqa predicanankuta munaspaqa, allinta predicanankupaqmi yachachina. Ñawpaqpi willakuq hermanan nillantaq: “Manan hayk’aqpas tayta mamayku predicaq lloqsiqtinku yanqallaqa riysiraykuchu. Ñoqaykupas predicaysiraykun tratadokunata haywaspa otaq punkullatapas takaspa. Semana tukuykunata predicaq lloqsinaykupaq ñawpaqmanta preparación chaskisqaykun, yanapawaranku ima ninaykupaqpas”, nispa. Qankunapas yachachillawaqchistaqmi wawaykichista imayna predicanankupaq, semanapi iskay kinsa minutollapi familiapi estudiashaspa otaq huk ratokunapi.
4 Familiantin predicayqa yanapasunkichismi wawaykichista cheqaq yachachinaykichispaq. Huk cristianon ususintin risqa huk huch’uy llaqtata tratadokuna rakinankupaq, chayman chayanankupaqmi purisqaku iskaychunka kilometrota kutit’ikrapi. Ususinmi munakuywan yuyarispa nin: “Chhayna viajasqaykupin taytayqa sonqoypi cheqaqta tarpuran”, nispa (Deu. 6:7). Chhaynallatataq Jehová Dios saminchachun, sapa semana predicanapaq, familiaykiq horarionpi churasqaykimanta.