Allin willakuykunata apasun llapa runakunaman
1. ¿Imakunatan ñawpaq tiempopi cristianokuna ruwaranku allin willakuykunata llapa runakunaman chayachinankupaq?
1 Jesuspa ñawpaq qatikuqninkunan sonqomanta munaranku Reinomanta willakuykuna ch’eqechiyta, chaypaqmi allinta yuyaykuspa allichakuranku llapa runakunaman allin willakuykunata chayachinankupaq. Chaypaqqa, Biblia qelqaq cristianokunan griego simipi Diospa Siminta qelqaranku, chay griego simitan lliw Roma suyupi rimaranku. Chaymantapas iskay pachaq, kinsa pachaq watakuna qhepaman, yaqapaschá tukuy sonqowan predicaqkuna paykunaraq kallpachakuranku hojakunayoq libro ruwaypi yachachinankupaq, chaywan manaña sasatachu maskhanankupaq qara k’uyu qelqata hina.
2, 3. a) ¿Imaynatan hunt’akushan kay tiemponchispi Isaías 60:16 texto? b) ¿Imaynatan cheqaq yupaychay mast’arikushan rikhurimuq maquinakunaq yanapayninwan?
2 Rikhurimuq maquinakunawan yanapachikuspa. Profeta Isaiaswanmi Jehová Diosqa willachiran: “Hatun suyukunan allinnin mikhunawan uywasunkiku”, nispa (Isa. 60:16). Chay profecian hunt’akushan kay tiempopi, chaymi suyukunaq ruwasqan maquinakunawan Diospa kamachinkuna llank’ashanku predicayta ch’eqerichinankupaq. Ejemplopaq, 1914 wata ñawpaqninta manaraq runakuna peliculakunata qhapaqyanankupaq ruwashaqtinku, Biblia Estudiaqkunaqa orqomurankuñan “Foto-Drama de la Creación” nisqata qhawachinankupaq. Cinepi hina colorniyoq fotokuna, uyarikuq peliculakunapas pusaq horapin tukuran, chaykunawanmi millonninpi runakunata yachachiranku.
3 Kay p’unchaykunapipas Diospa llaqtanqa llank’ashan usqhaylla ruwaq maquinakunawan, computadorallawanña manejasqa maquinakunapiwan, chaykunawanmi ruwashanku Bibliakunata, huk qelqakunatapas pachaq pachaq simikunapi. Lliw kay qelqakunatan apachikun barcopi, avionkunapi, carrokunapipas Allpaq k’uchunkunaman, chayantaqmi 235 suyukunaman. Jehová Diosqa espiritunwanmi kamachinkunata yanapashan, rikhurimuq maquinakunawan yanapachikuspa Bibliapi willakuykunata llapa runaman apanankupaq.
4. ¿Imakunatan ruwaranku wakin cristianokuna allin willakuykunata huk runakunaman apanankupaq?
4 Aswanta ruwasun. Cheqaq yupaychaqkunapas astawanmi kallpachakushanku allin willakuykunata huk runakunaman apanankupaq. Askha cristianokunañan imaymana kaqninkuta, ruwayninkutapas pisiyachishanku astawan predicanankupaq. Hukkunaqa, Reinomanta willanapaq maykunapin astawan llank’ana kashan, chaykunamanmi astakunku. Hukkunataq predicayninkuta yapashanku huk suyumanta simikunata yachaspa.
5, 6. ¿Imatan ruwananchis llaqtanchispi llapa runakunaman predicanapaq?
5 Yachachillasunmantaqmi allin willakuykunata wasinkupi kaq runakunaman, may kasqankupipas. Predicasqayki llaqtapi wasiyoqkunata mana tarispa, ¿horarioykita cambiawaqchu manaraq ch’isiyashaqtin predicaq lloqsinaykipaq? ¿Kanchu parquekuna, callekuna, plazakunapas predicanaykipaq? ¿Predicarankichu telefonopi otaq runakunaq qhatusqanpipas? ¿Predicashankichu may kasqaykipipas?
6 ¡Hatun saminchaymi, Jehová Diospa sutinmanta kamachikuyninmantawan willayqa! Diospa Siminpi kawsachiq cheqaqta willashallasun llapa runakunaman (Mat. 28:19, 20).