¿Imakunatan ‘ruwananchis allin willakuykunarayku’?
1. ¿Imakunatan ruwananchis Diosta serviqkuna? ¿Imaraykun chayta ruwananchis?
1 Pabloqa runamasinkuna wiñay kawsayman aypananta munasqanraykun tukuy imaymanata ruwaran paykunaman allin willakuykunata willananpaq (1 Cor. 9:16, 19, 23). Chayraykullataqmi ñoqanchispas kallpachakunchis runakunaman allin willakuykunata willananchispaq.
2. ¿Imakunatan ruwasunman allin sonqo runakunata tarinapaq?
2 ¿Maykunapi, ima horaskunatan predikasunman? Challwaqqa manan comuntachu maymanpas llikanta wikch’uyun, aswanmi maypichus askha challwakuna kan chayman wikch’uyun. Ñoqanchispas ‘runakunata challwaqtaq kanchis’ chayqa, imaymanatan ruwananchis allin sonqo runakunata tarinanchispaq, chhaynapin ‘tukuy imaymana rikch’ayniyoq challwakunata’ hap’isunchis (Mat. 4:19; 13:47). ¿Imakunatan chaypaq ruwasunman? Yaqapaschá callekunapi tutaychallamanta otaq ch’isinkunata predicasunman. Pablopas chaytan ruwaran, payqa maypiña tarikuspapas predicallaqpunin, chhaynapi “Señor Jesusmanta chaskisqan llank’anata” allintapuni hunt’ananpaq (Hech. 17:17; 20:20, 24).
3, 4. ¿Imakunatan ruwananchis runakunaq necesitasqanman hina predicanapaq? ¿Imakunan kanqa chayta ruwaqtinchis?
3 Runakunaq necesitasqanman hinan predicana: Challwaqkunaqa ima challwatachus hap’iyta munanku chayman hinan imatapas ruwanku. Ñoqanchispas chay challwaq hinan runakunaq imachus necesitasqanman hina predicananchis. Chaypaqqa yaqapaschá imamantapas rimapayasunman, chaymantataq makilla uyarisunman ima ninqachus chayta (Sant. 1:19). Chaymantapas runakuna imatachus piensasqanta yachanapaqqa tapunanchismi (Pro. 20:5). Chhaynapin yachasun imachus llakichisqanta, chayman hinataq rimapayasunpas. Pablopas chaytan ruwaran, payqa “lliw runapaqmi paykuna hina” karan (1 Cor. 9:22). Arí, payqa runakunaq necesitasqanman hinan rimapayaq. Chay ruwayqa allinpunin runakunaq sonqonman chayanapaqqa.
4 ¡May munaymi “allin willakuykunata” willayqa! (Isa. 52:7.) Ñoqanchisqa llapa runakuna “allin willakuykuna[ta]” yachanantataq munanchis chayqa, tukuy atisqanchistan ruwananchis paykunaman chay willakuykunata willananchispaq (1 Cor. 9:23).