Chunka iskayniyoq kaq parte: Diosta servinankupaq hina estudiota qosun
Yachachisqakunata yanapasun Bibliamanta estudiokunata qallarinankupaq qonankupaqpas
1 Yachachisqanchiskuna servicioman lloqsiyta qallariqtinkuqa, yaqapaschá manchakunqaku Bibliamanta estudiokunata qallarinankupaq qonankupaqpas. Estudio qoyqa ancha chaniyoqmi servicionchispi, ¿imaynata yanapasunman yachachisqanchiskunata mana manchakuspa estudiokunata qallarinankupaq? (Mat. 24:14; 28:19, 20.)
2 Yachachisqanchis mana bautizasqa publicador kananpaq kamachiykunata hunt’aqtinqa, yaqapaschá Escuela del Ministerio Teocrático nisqapi matriculasqaña kashan. Discursokunata qonanpaq yachachiykuna chaskisqanqa, yanapanqa allin yachachiq kananpaq, “cheqaqkay simita allin yachachiq, mana imamantapas p’enqakuyniyoq llank’aq hina” (2 Tim. 2:15).
3 Ruwasqaykikunawan yachachiy. Jesusqa yanaparanmi qatipaqninkunata allinta yachachispa, ruwasqankunatapas rikuchispa. Payqa niran: “Yachachisqaqa [...] astawan yachaspaqa yachachiqnin hinan kanqa”, nispa (Luc. 6:40). Chaniyoqmi noqanchispaqqa Jesuspa ruwasqankunata qatikuyqa, chayrayku predicaypipas qatikunapaq hina kananchis. Yachachisqaqa ruwasqanchista qhawaspa reparanqa revisita ruwayqa Bibliamanta estudiokunata qallarinapaq kasqanta.
4 Yachachiy, estudiota munachishaqtinqa mana nishutachu rimanan imayna estudio kasqanmanta. Aswan allin kanman estudianapaq libromanta huk otaq iskay parrafokunallawan imayna estudio kasqanta rikuchiyqa. Allin yanapaykunataqa tariwaqmi pusaq paginapi kay Reinopaq Servicionchispi, chaymantapas 6 paginapi, enero killapi, 2002 wata Reinopaq Servicionchispi.
5 Atikuqtinqa kallpachay yachachisqaykita qanwan otaq poqosqa wayqewan huk estudioman rinanpaq; payqa yanapanmanmi estudiopi huk parrafomanta otaq huk allin textomanta rimaspa. Qhawawaqtinchis yachachisqanchisqa astawan yachanqa Diosta servinankupaq hina yachachiyta (Pro. 27:17; 2 Tim. 2:2). Kallpachay ruwasqanmanta, niytaq imaynatan aswan allinta yachachinman.
6 Mosoq publicadorkuna Diospa Siminmanta allin yachachiq kanankupaq yachachiyqa, allinta yanapanqa ‘allin kaqkunata’ ruwanankupaq paykunallamanta Bibliamanta estudiokunata qallarinankupaqpas qonankupaqpas (2 Tim. 3:17). Anchatapuni kusichiwanchis paykunawan kuska llank’ayqa, kay mink’ayta mast’arinanchispaq: “Pipas ch’akichikuqqa hamuchun, kawsachiq unuta ukyay munaqqa yanqalla ukyachun” (Rev. 22:17).