Hukkuna hukkunawan kallpachanakusunchis
1 Apostol Pabloqa tukuy atisqanta ruwaran iñiqmasinkunata kallpachananpaq (Hech. 14:19-22). Chhaynallataqmi noqanchispas, wayqepanakuna sasachakuykunapi tarikuqtinku llakikunchis, yanapaytataq munanchis. Biblian niwanchis llapanchista, manan ancianokunallatachu, hukkunamanta llakikunanchispaq (Rom. 15:1, 2). Iskayta qhawasunchis imayna kay qatiq anyayta kasukusunman: “Hukkuna hukkunawan sonqochanakuspa kallpachanakuychis” (1 Tes. 5:11).
2 Huqkkunaq sasachakuyninkuta reparasun: Diospa Simin qelqaqa Dorcasmanta nin: “Chay warmin ancha allinkunata ruwaq, wakchakunatapas yanapaq”, nispa (Hech. 9:36, 39). Payqa repararanmi hukkunaq sasachakuyninkuta, atisqanman hinataq yanaparan. ¡Qatikunapaq hinapuni ruwasqanqa! Yachashanchispaschá huñunakuykunaman rinapaq yanapay munaq yuyaq wayqepanamanta. Otaq semanapi huk tardenta mana piwan lloqsiq precursormanta. Sichus pipas sasachakuykunapi kasqanta reparasunchis, yanapasunchistaq chayqa, hayk’ataraqchá chaywan kallpachakunqa.
3 Espiritual ruwaykunamanta rimasun: Rimayninchiskunawanpas kallpachasunmanmi hukkunata (Efe. 4:29). Huk yuyaymanasqa anciano niran: “Kallpachaq kayta munaqtiykiqa, espiritual ruwaykunamanta rimay. Kallpachaq rimaytaqa qallariwaqmi ima tapuykunallawanpas. Ejemplopaq: ‘¿Imaynata cheqaq kayta reqsiranki?’”. Khuyayta llakikunanchis congregacionpi kaq waynasipaskunamanta, kallpankupi pisiyasqakunamanta, manchalikunamantapas (Pro. 12:25). Ama hayk’aqpas kay pachaq rimaykunawanqa patanchasunchischu espiritual rimayninchiskunataqa (Rom. 1:11, 12).
4 ¿Imatan nisunman hukkunata kallpachananchispaq? ¿Tariranchischu chayraq Biblia leesqanchispi ima kamachikuytapas Jehová Diosta astawan munakunanchispaq? ¿Kusichiwaranchischu imallapas hatun discursopi (discurso público) uyarisqanchis otaq Atalaya revistata estudiaspa? ¿Kuyuchirasunkichu sonqoykita, ima iñi-kallpachaq willakuypas? Sichus sonqonchispi hap’isun kay qori hina espiritual yanapaykunata chayqa, hukkunata kallpachanapaq rimayninchiskunaqa kapullawasunpuni (Pro. 2:1; Luc. 6:45).
5 Chayrayku, ruwanapaq hina yanapaykunata qosunchis, qallunchistataq allintapuni kamachikusun. Ahinapin hukkuna hukkunawan kallpachanakusunchis (Pro. 12:18).